Dy persona janë arrestuar nga policia e Tiranës, njëri prej të cilëve person me rrezikshmëri të lartë shoqërore, i cili ishte shpallur në kërkim për tentativë vrasje dhe armëmbajtje pa leje.
Kështu në kuadër të operacionit të koduar “Klienti”, u arrestua shtetasi me iniciale B. S.(Z)., 35 vjeç, i shpallur në kërkim për llogari të DVP Dibër, për veprat penale “Vrasja me paramendim” mbetur në tentativë dhe “Armëmbajtja pa leje”, si dhe shtetasi A. A., 33 vjeç, banues në Tiranë.
Dy të arrestuarve iu sekuestrua 800 gramë kokainë, 1 automjet dhe 1 aparat celular.
“Shtetasi B. S.(Z)., me anë të lidhjeve të tij shoqërore siguronte sasi të mëdha lënde narkotike të llojit kokaine, të cilën ia jepte më pas shtetasit A. A., që ta shiste në doza të vogla, te klientë të ndryshëm në qytetin e Tiranës, me sasi nga 100 gramë deri në 1 kg, kundrejt vlerës 45 euro për gram.
Në vendin e quajtur “21 Dhjetori”, gjatë kontrollit fizik të ushtruar ndaj këtyre shtetasve, u gjet një sasi me rreth 800 gramë lëndë narkotike kokainë, e cila u sekuestruan në cilësinë e provës materiale, së bashku 1 aparat celular dhe një automjet që autorët e përdornin për shpërndarjen e lëndës narkotike”, thuhet në njoftimin e policisë.
Materialet iu dërguan Prokurorisë së Rrethit Gjyqësor Tiranë, për veprime të mëtejshme hetimore.
g.kosovari
