Nga ARTUR AJAZI
Dhuna, shkatërrimi, djegiet, plagosjet, tendenca për të gjymtuar ndonjë polic, fyerjet dhe sharjet nga më banalet, krekosje e organizatorit kryesor të protestave, zero qëndrim reflektues ndaj asaj që ndodhi. Kjo ishte dhe është Partia Demokratike. Ajo parti që qysh në fillimet e demokracisë, gjakosi dhe shtypi me ashpërsinë e paparë ndonjëherë zgjedhjet e 26 Majit 1996, rrahu, plagosi dhe burgosi opozitarë, kryetarë partie, deputetë, gazetarë dhe qytetarë, shtypi me dhunë protestat e atyre, që kundërshtuan vjedhjen e votës nga bandat me mbështetje qeveritare. Kjo ishte dhe kjo është Partia Demokratike, dje e Saliut dhe sot e Lulzimit, dje e dhunës dhe sot e shkatërrimit.
Kjo ishte dhe kjo është Partia Demokratike, që nuk lë plagosje, vrasje, grabitje dhe raste të tjera kriminale, që nuk u bën “analizën dhe mbrojtjen”, që nuk u bën avokatin, prokurorin dhe gjyqtarin, duke nxitur turma të organizuara dhe mirëpaguara, për të shkatërruar dhe djegur institucionet, për të dhunuar dhe plagosur policët, ata bij nënash që janë të detyruar ti durojnë pa fund. Kjo ishte dhe kjo është edhe sot Partia Demokratike, e cila vetëm liri dhe demokraci nuk reflekton, e cila vetëm liri dhe të drejta nuk të dhuron, por veç skena makabriteti pothuajse çdo 6 muaj në qendër të Tiranës. Persona që nuk kanë asnjë lidhje me rastin e ndodhur në Tiranë, persona të dyshimtë dhe të molepsur me lloj-lloj fijesh, ju bashkuan “protestës” së Lulzim Bashës, dhe e kthyen qendrën e Tiranës në tym dhe flakë, shkatërruan institucionet, dhunuan unoformat e shtetit.
Në cilin vend të Europës apo dhe botës, një polici do të kishte duruar dhe toleruar një turmë ti shkatërronte institucionet, dhe ti plagoste efektivat ? Kështu ndodh në Hollandë zoti Basha ? Meqenëse thua se “jam shkolluar dhe diplomuar jashtë shtetit”. Një kryetar partie i shkolluar dhe diplomuar jashtë shtetit (apo edhe në Shqipëri) nuk mund të bëhet nxitës dhe organizator i protestave të dhunshme, nuk mund të mbledhë rreth vehtes dhe partisë tij, elementë dhe kontigjentë dhune, për të cilët ligji duhet të veprojë pa asnjë vonesë. Kjo ishte dhe kjo është Partia Demokratike, e cila veç mbiemrit, nuk ka asnjë lidhje me demokracinë, me zbatimin e ligjit, pasi ajo njeh vetëm xhunglën, si terren të përshtatshëm për të arritur deri tek pushteti.
Lulzim, iku ajo kohë, kur trimoshat e partisë tënde, dilnin dhe hidhnin molotovë, digjnin dyert e institucioneve dhe thyenin xhamat, kur ti dhe Doktori yt, u dilnit në mbrojtje dhe i quanit “anëtarë të partisë, heronj dhe martirë të demokracisë”.Skenat e dhunës në protestën e mbrëmshme, e përforcuan edhe njëherë mendimin e shumicës së shqiptarëve, se Partia Demokratike ka mbetur ajo që ka qenë, dhe se Lulzim Basha ka mbetur ai që ka qenë edhe në 21 Janar kur ishte ministri Brëndshëm i Sali Berishës.
