Nga Lorenc Vangjeli /
Çfarë të bën Facebook-u nuk ta bën as Perëndia
“Falenderoj qytetarin që solli këtë video. Ndaj punonjësit të policisë u morr masë administrative”. Ky është mesazhi i sotëm në Facebook i ministrit të brendshëm Saimir Tahiri. Një mesazh që pothuaj në këtë formë është publikikuar në shumë e shumë raste që kanë të bëjnë me punonjës policie të filmuar nga qytetarë të rastësishëm që denoncojnë kundravjatje nga më të ndryshmet. Si në rastin e Korçës pak javë më parë ku një djalë i ri u dhunua fizikisht në mes të rrugës apo dhe raste të tjera të mosrespektimit të rregullave të qarkullimit rrugor. Tahiri ndërhyn menjëherë mbas çdo shfaqjeje të llojit Big Brother që ka të bëjë me policinë dhe kjo është një gjë e mirë. Sepse është një argument i shkëlqyer praktik i proverbit të vjetër që kush bën edhe pëson! Pikërisht çfarë nuk ka ndodhur në vite e vite me rradhë në Shqipëri me kulturën e pandëshkueshmërisë. E cila niste që me kalimin me të kuqe të semaforit nga uniformat blu, për shembull dhe përfundonte deri me ndarjen ulëritëse të detit me fqinjin apo me miliona e miliona euro që hidheshin njëlloj si ujë në det në projektin e rrugës së Kombit. Për të mos folur për shpërthimin që vrau 26 vetë në Gërdec apo ekzekutimin që barbaria e bërë sërish në transmetim live të katër qytetarëve pa gjyq në mes të Tiranës, ku nuk është ndëshkuar askush ose janë ndëshkuar armët, por jo kush qëlloi me armë.
Tirana, por dhe gjetkë rrugët e Shqipërisë janë shndërruar në skenën gjigante të vëzhgimit 24 orë në 24. Një shumicvë dërmuese krimesh janë zbardhur apo kanë shkuar në zbardhje e sipër për shkak të kamerave të sigurisë që biznese të shpërndarë gjithkund kanë regjistruar dhe më pas i kanë dorëzuar në polici. Falë këtyre kamerave, qytetarët janë bërë dëshmitarë të krimeve të jashtëzakonshme dhe ngjethëse në dinamikën e ekzekutimit të krimit. Kanë ngjallur tmerr, por natyrisht dhe shpresë për ndëshkimin e mundshëm të kriminelëve. Sepse teknologjia po ndryshon botën e gjithësecilit. Tashmë, çdo qytetar është përfundimisht një gazetar dhe secili nga ta, minimalisht ka gazetën e tij personale dhe virtuale, Facebook-un, nga ku, më shpejt se çdo epidemi, lajmi mund të shkojë në çdo cep të botës. Dhe për të mbetur në këtë botën tonë të vogël në Tiranë, po nga gazeta e tij vetjake dhe virtuale, ministri i brendshëm Tahiri falenderon më pas kolegun gazetar dhe i konfirmon gjithë lexuesve të tij për ndëshkimin që i dha vartësit të tij administrativ.
