Shirat e dendur që goditën provincën Shanxi në Kinën veriore shkaktuan dëme në një pjesë të murit të qytetit antik të Pingyao, njoftuan autoritetet lokale, të cilët saktësuan se tashmë kanë nisur punimet për riparimin e tij, përcjell “Xinhua”.
Rrëzimi i pjesshëm i murit të brendshëm të qytetit, nuk ka shkaktuar viktima.

Zyrtarët dhe ekspertët nga mbrojtja e objekteve kulturore shkuan menjëherë në vend dhe morën masa urgjente për të parandaluar shembjen e mëtejshme dhe të ruanin sigurinë e banorëve dhe turistëve.
Me një histori 2700-vjeçare, Pingyao është i njohur për arkitekturën e tij të lashtë ende të ruajtur mirë dhe u emërua zonë e Trashëgimisë Botërore të UNESCO-s në vitin 1997.
