Gjatë samitit të ardhshëm të datës 29 Qershor në Bruksel, Kina pritet të premtojë një plan të ri investimesh multi-miliardash në infratsrukturën europiane. Shifra ekzakte e investimit ende nuk është bërë e qartë, por kjo lëvizje vjen në kuadër të planit kinez për të riformuar qeverisjen globale, që aktualisht mbahet nga Shtetet e Bashkuara të Amerikës. Gjatë samitit të datës 29 Qershor në Burksel, i pranishëm do të jetë vetë kryeministri kinez.
Kreu i ekzekutivit kinez pritet të ofrojë si garanci për projektet në infrastrukturë dhe teknologji, fondin prej rreth 315 miliardë euro. Nëse kjo marrëveshje do të vulosej, atëherë ky do të ishte ndoshta suksesi më i madh i kreut të Komisionit Europian, Jean-Claude Juncker, i cili vitin e shkuar u përball me kritika të shumta për propozimin e tij të krijimit të fondit europian për investime strategjike. Asokohe, Juncker u shpreh se ky fond është mëse i nevojshëm, pasi qeveritë e Bashkimit Europian po lënë mënjanë shumë pak para për investime të përbashkëta. Deri më tani, Franca, Gjermania, Italia dhe Polonia janë zotuar të kontribuojnë me 8 miliardë euro në këtë fond.
Aktualisht, blloku mbështet kryesisht në investitorët privatë dhe bankat për zhvillim për të vënë në jetë projektet që kapin një vlerë totale prej 1.3 trilionë euro. Për sa i përket investimit të Kinës, në pikpyetje mbetet fakti nëse qeveria aziatike do të kërkojë të drejta administruese të këtij fondi. Këto të drejta janë ekskluzivitet i institucioneve europiane. Nga ana tjetër, kërkesa për të ftuar Kinën në këtë fond mund të rrisë pakënaqësitë e Washingtonit. Të njëjtën gjë, qeveria kineze po bën edhe me Amerikën Jugore, ku ka vënë në jetë një plan investimesh prej 250 miliardë dollarë./Roel Korkuti,TVScan/
