Gjatë gjithë muajit dhjetor, rrjetet sociale shpërthyen nga publikime me tekst, foto dhe video që tregonin njerëz të infektuar me një virus atëherë misterioz, i cili bënte që njerëzit të përfundonin në spitale dhe shumë prej tyre vdisnin në pak ditë.
Ndonëse bota po informohej gjatë dhjetorit 2019 për atë që po ndodhte, qeveria komuniste kineze vetëm më 31 dhjetor 2019 u deklarua zyrtarisht duke thënë se më 30 dhjetor kishte regjistruar rastin e parë me një virus që ishte i ngjashëm me SARS që shpërtheu më 2004-2005 po në Kinë e më tej në mbarë botën.
Pikërisht të dhënat e rasteve të para, kërkojnë ekspertët e Organizatës Botërore të Shëndetësisë, mes tyre dhe ata amerikanë, për të kuptuar si nisi pandemia COVID-19.
Kur një ekip i OBSH-së shkoi disa muaj më parë në Wuhan, ai mori vetëm disa të dhëna që u dhanë nga autoritetet kineze, por jo plot të tjera që kërkuan ekspertët.
Ekipi me ekspertë ndërkombëtarë, bashkë me homologët e tyre kinezë në janar të këtij viti, nuk arriti në një përfundim të qartë sesi është përhapur fillimisht virusi.
Kur ekipi mbërriti në Zvicër, njoftoi se të dhënat që mori ishin të pakta e megjithatë prej tyre hidhen dyshime se kovidi mund të ketë dalë në popullatë përmes laboratorit të Wuhanit.
Në raport është thënë se kalimi i virusit nga lakuriqi në njeri, përmes një kafshe ndërmjetësuese, është skenari më i mundshëm, dhe teoria e daljes së virusit nga laboratori në Vuhan, “është e mundshme”.
Në këto kushte, OBSH ka kërkuar që të kryhen hetimet reja për origjinën e koronavirusit, por Kina ka refuzuar kërkesën, duke pretenduar se kjo çështje po politizohet.
OBSH-ja njoftoi se ka kërkuar prej Kinës që të ndajë të dhënat fillestare rreth koronavirusit, për të analizuar origjinën e sëmundjes COVID-19, që shkakton ky virus.
Përgjigjja zyrtare nga Kina erdhi sot nga zëvëndësministri i Jashtëm, Ma Zhaoxu. Ai tha se hetimi fillestar ka qenë i mjaftueshëm dhe thirrjet për më shumë të dhëna janë të motivuara nga politika dhe jo shkenca.
“Ne kundërshtojmë gjurmimet mbi baza politike dhe braktisjen e raportit të përbashkët” të lëshuar pas vizitës së ekspertëve të OBSH-së në Vuhan, tha sot, Zhaoxu në Pekin, në një dëgjesë me përfaqësuesit dhe ambasadorët e 29 vendeve.
Ma shtjelloi katër propozimet e Kinës për gjurmimin e koronavirusit të ri në mbarë botën.
Së pari, gjurmimi i koronavirusit të ri është një problem shkencor. Studiuesit duhet të kërkojnë burimin e virusit te kafshët dhe rrugët e përhapjes ndër njerëzit.
Së dyti, raporti i përbashkët studimor Kinë-OBSh ka nxjerrë përfundime dhe sugjerime të pranuara nga komuniteti ndërkombëtar dhe qarqet shkencore. Ky raport duhet të respektohet e të zbatohet prej palëve të ndryshme, duke përfshirë Sekretariatin e OBSh-së.
Së treti, pala kineze ka mbështetur gjithmonë dhe do të vazhdojë të marrë pjesë aktivisht në punët e gjurmimit shkencor.
Së katërti, punët e gjurmimit në mbarë botën duhet të drejtohen nga vendet anëtare të OBSh-së.
/b.h
