Zyra e Informacionit e Këshillit të Shtetit të Kinës publikoi të dielën një libër të bardhë që detajon zhvillimin demografik në Rajonin Autonom të Xinjiang-Ujgurit të Kinës Veriperëndimore.
Rritja e popullsisë në Xinjiang në periudhën e viteve 2000 deri në 2020 ishte 1.15 pikë përqindjeje më e lartë se mesatarja vjetore kombëtare, sipas librit të bardhë të titulluar “Dinamikat dhe të dhënat e popullsisë në Xinjiang”.
Popullsia ujgure në Xinjiang ka ruajtur një normë relativisht të lartë rritjeje prej 1.67 për qind në vit, duke arritur nga mbi 8.34 milionë në vitin 2000 në më shumë se 11.62 milionë vjet. Shkalla e rritjes ishte shumë më e lartë se ajo e popullsisë së pakicave të tjera kombëtare të vendit, e cila ishte 0.83 për qind, thekson dokumenti.
Statusi ekonomik, shoqëror dhe familjar i grave të të gjitha kombësive në Xinjiang ka vazhduar të përmirësohet dhe numri e përpjesëtimi i grave të punësuara janë rritur ndjeshëm. Në vitin 2019, për shembull, 228 100 gra iu bashkuan fuqisë punëtore në qytetet dhe qytezat në mbarë Xinjiang-un, duke zënë 47.43 për qind të numrit të përgjithshëm të të punësuarve të rinj në zonat urbane.
Gjithashtu, në dokument vihet në dukje se besimtarët janë të lirë të përfshihen në veprimtari të ligjshme fetare, duke përfshirë adhurimin, agjërimin dhe kremtimin e festave fetare, në përputhje me doktrinat, kanunet dhe traditat fetare, në objektet fetare ose në shtëpitë e tyre.
Për të përmbushur nevojat e ligjshme fetare të besimtarëve, në Xinjiang janë përmirësuar kushtet e objekteve fetare dhe mjediset e tyre përreth me anë të rinovimit dhe zhvendosjes, duke zgjeruar objektet ekzistuese dhe duke ndërtuar objekte të reja.
Sipas dokumentit, Xinjiang-u e zbaton politikën e vet të planifikimit familjar në përputhje me ligjin, dhe kontrolli i detyruar i lindjeve dhe testet e shtatzanisë janë rreptësisht të ndaluara. U takon individëve të vendosin nëse do të përdorin apo jo kontraceptivë dhe si t’i përdorin ata. Asnjë organizatë a individ nuk mund të ndërhyjë në këtë liri, thuhet në dokument.
Lidhur me shkollat me konvikt, në librin e bardhë thuhet se, për shkak të sipërfaqes së madhe të territorit të Xinjiang-ut, fshatrat dhe qytetet janë larg njëri-tjetrit dhe banorët në disa zona bujqësore e blegtorale janë mjaft të shpërndarë, duke e bërë udhëtimin e përditshëm midis shtëpisë dhe shkollës shumë të vështirë për disa nxënës.
Krijimi i shkollave me konvikt është një praktikë standarde në arsimin e detyrueshëm në Kinë dhe u takon familjeve të nxënësve të vendosin nëse fëmijët e tyre do të rrinë në konvikt apo jo, thuhet në librin e bardhë.
/b.h
