Komisioni Kombëtar i Shëndetësisë përsëriti të martën se klinikat estetike, sallonet e thonjve dhe sallonet e flokëve janë të ndaluara të kryejnë procedura kozmetike jokirurgjikale dhe i kërkoi publikut të qëndrojë vigjilent ndaj shërbimeve të paligjshme të bukurisë, shkruan “China Daily”.
Xie Yang, një zëdhënëse e komisionit, tha se procedurat kozmetike jokirurgjikale, të tilla si trajtimet me laser dhe injeksionet e ilaçeve, kanë fituar popullaritet vitet e fundit. Megjithatë, tregtarët e paskrupullt kanë nxitur ankthin për pamjen fizike dhe kanë fshehur rreziqet e mundshme të trajtimeve të tilla. Disa madje kanë nisur kurse trajnimi të përshpejtuara në të cilat praktikantët udhëzohen të administrojnë injeksione tek njëri-tjetri, duke çuar në raste lëndimesh ose edhe paaftësie.
Xie theksoi se procedurat kozmetike jo-kirurgjikale janë të natyrës mjekësore dhe duhet të kryhen në institucione mjekësore të kualifikuara nga profesionistë të licencuar mjekësorë. Sallonet e bukurisë janë rreptësisht të ndaluara të kryejnë procedura të tilla.
Publikut i këshillohet mos ta komprometojë shëndetin dhe sigurinë e tij duke zgjedhur alternativa më të lira ose ofrues të pakualifikuar, tha ajo.
Organizimi ose pjesëmarrja në kurse intensive për procedurat kozmetike mund të përfshijë aktivitete të paligjshme, të tilla si praktika mjekësore pa licencë, përdorimi ose shitja e paautorizuar e produkteve dhe pajisjeve kozmetike mjekësore dhe lëshimi i certifikatave të falsifikuara të trajnimit ose kualifikimit, tha Xie.
Ajo i bëri thirrje publikut të raportojë çdo procedurë të dyshuar kozmetike të paligjshme tek autoritetet lokale shëndetësore.
