Ministria e Punëve të Jashtme të Kinës u shpreh të hënën se kundërshton ndërhyrjen e çfarëdo force të huaj në çështjet e Makaos dhe punët e brendshme të Kinës.
Në një përgjigje me shkrim për pyetjen mbi vendimin e gjykatës në lidhje me skualifikimin e tre kandidatëve për zgjedhjet në Makao, zëdhënësja e Ministrisë së Punëve të Jashtme të Kinës kritikoi komentet e ShBA-së dhe BE-së mbi vendimin.
Gjykata e Apelit Përfundimtar të Makaos mori të shtunën vendimin për të hedhur poshtë ankesat e paraqitura nga tre ekipe kandidate dhe për të mbajtur vendimin e Komisionit të Çështjeve Zgjedhore për Zgjedhjet e Asamblesë Legjislative për të përjashtuar listat e tyre të kandidatëve nga zgjedhjet e ardhshme. Zëdhënësit e Departamentit Amerikan të Shtetit dhe të Shërbimit Evropian të Veprimit të Jashtëm shprehën kundërshtimin e tyre ndaj skualifikimit të kandidatëve.
Zëdhënësja e Ministrisë së Punëve të Jashtme kineze u shpreh se Pekini i hedh poshtë “komentet ” mbi çështjet e Rajonit të Posaçëm Administrativ të Makaos .
Zëdhënësja theksoi se Makaoja është një rajon i posaçëm administrativ i Kinës dhe pala kineze do të vazhdojë të garantojë realizimin e qëndrueshëm dhe të suksesshëm të parimit “Një vend, dy sisteme”. Njëkohësisht, Pekini do të kundërshtojë ndërhyrjen e çfarëdo force të huaj në çështjet e Makaos dhe punët e brendshme të Kinës.
