Kina do të çojë përpara arritjet në zhdukjen e varfërisë nëpërmjet rigjallërimit rural

Kina do të konsolidojë dhe çojë përpara arritjen në zhdukjen e varfërisë nëpërmjet promovimit të rigjallërimit rural, tha të shtunën në Pekin kryeministri kinez Li Keqiang.

Duke mbajtur raportin e punës së qeverisë në sesionin e 5-të të Asamblesë së 13-të Kombëtare Popullore në Pallatin e Madh të Popullit në Pekin, Li theksoi se Kina do të vijojë të zbatojë strategjinë për rigjallërimin rural dhe të nxitë reformën rurale në mënyrë të qëndrueshme e të matur.

Kryeministri kinez tha se do të zbatohet një mekanizëm më i mirë monitorimi dhe ndihme për të parandaluar kthimin masiv në varfëri.

“Ne do të mbështesim zonat që janë larguar nga varfëria të zhvillojnë biznes karakteristik vendor dhe të forcojnë bashkëpunimin në fushën e fuqisë punëtore dhe përgatitjes profesionale, për t’i ndihmuar njerëzit që nuk janë më të varfër të rrisin vazhdimisht të ardhurat e tyre,” vuri në dukje ai.

Li bëri thirrje për përmirësimin e shërbimeve financiare në zonat rurale, kultivimin e mëtejshëm të virtyteve qytetare në fshatrat e qyteza dhe përmirësimin e infrastrukturës në zonat rurale.

Kryeministri kinez u zotua për pagesën e rrogave të prapambetura të punëtorëve nga fshati, duke thënë se Kina do të mbështetë punësimin dhe nisjen e biznesit nga ky grup i shoqërisë.

“Ne do të bëjmë gjithçka për të krijuar më shumë mënyra për të ngritur të ardhurat e banorëve të fshatit nga punët jobujqësore,” shtoi kryeministri.