Sipas raportimeve, qeveria e Britanisë së Madhe njoftoi të enjten që kishte shtetëzuar “British Steel” në përputhje me Aktin e (Nacionalizimit të) Industrisë së Çelikut, duke marrë përsipër ndërmarrjen e kontrolluar më parë nga Grupi “Jingye” i Kinës, dhe do të krijojë një mekanizëm kompensimi nëpërmjet legjislacionit dytësor, me një vlerësim të pavarur për të përcaktuar nëse nevojitet kompensim. Kryeministri i Mbretërisë së Bashkuar Keir Starmer deklaroi që ky vendim mbron të ardhmen e industrisë së çelikut të Mbretërisë së Bashkuar dhe vendet e punës të kualifikuara.
Duke folur për këtë çështje, zëdhënësi i MPJ të Kinës tha:”Më lejoni të theksoj se kjo çështje ka tërhequr vëmendjen e madhe të publikut kinez,” duke vënë në dukje që mënyra se si e trajton Mbretëria e Bashkuar këtë çështje do të ndikojë drejtpërdrejt në mënyrën se si investitorët kinezë e shohin mjedisin e investimeve në Britaninë e Madhe dhe besueshmërinë e qeverisë së saj.
Zëdhënësi tha që Kina dhe Britania e Madhe kanë nënshkruar një marrëveshje në lidhje me mbrojtjen e investimeve, dhe të drejtat e interesat e ligjshme të investitorëve duhet të mbrohen plotësisht në përputhje me ligjin.
“Kina i kërkon Britanisë së Madhe të respektojë me zell parimet e tregut dhe frymën e kontratës, duke gjetur një zgjidhje për kompensimin dhe çështje të tjera që është e pranueshme për të dyja palët”, shtoi zëdhënësi.
Të premten, një zëdhënës i Ministrisë kineze të Tregtisë tha se Kina kundërshton fuqimisht dhe shpreh pakënaqësi të fortë ndaj vendimit të qeverisë së Britanisë së Madhe për të shtetëzuar “British Steel”.
