Një operacion i gjerë i autoriteteve kineze ka çuar në arrestimin e 30 të krishterëve të lidhur me rrjetin e Kishës Zion, përfshirë pastorin e njohur Jin Mingri. Ngjarja, e cilësuar si goditja më e madhe ndaj të krishterëve në dekada, ka ngritur shqetësime për një fushatë të re shtypjeje ndaj kishave të nëndheshme në Kinë. Kishat e nëndheshme, janë komunitete fetare të krishtera që veprojnë jashtë sistemit zyrtar të regjistrimit dhe kontrollit shtetëror.
Arrestimet u kryen në të paktën 10 qytete, ndërsa Jin akuzohet për “përdorim të paligjshëm të rrjeteve të informacionit”. Aktivistët paralajmërojnë se kjo mund të jetë vetëm fillimi i një goditjeje më të gjerë ndaj komuniteteve të krishtera që nuk janë nën kontrollin e shtetit.
BBC shkruan se të premten e kaluar, Grace Jin Drexel mori një mesazh nga i ati në Kinë, pastori i njohur Jin Mingri, ku i kërkonte të lutej për një pastor tjetër që ishte zhdukur. Mesazhi tregonte se pastori ishte ndaluar gjatë një vizite në qytetin jugor të Shenzhenit.
“Pak më pas, më telefonoi nëna dhe më tha se nuk mund të kontaktonte me babain tim,” tha Drexel, e cila jeton në SHBA. Brenda pak orësh, familja kuptoi se edhe Jin ishte përfshirë në atë që aktivistët e kanë cilësuar si arrestimi më i madh i të krishterëve në Kinë në dekada.
Frika tani është se arrestimi i 30 të krishterëve, mund të jetë fillimi i një goditjeje më të gjerë ndaj kishave të nëndheshme. Ligje të reja të miratuara në Kinë duket se synojnë kufizimin e aktivitetit të kishave të paregjistruara, ndërsa presioni ndaj anëtarëve të tyre është shtuar muajt e fundit.
Megjithëse Kina drejtohet nga Partia Komuniste Ateiste, vendi ka një popullsi të konsiderueshme të krishterë. Sipas të dhënave zyrtare, ka rreth 38 milionë protestantë dhe gati gjashtë milionë katolikë. Por këto shifra përfshijnë vetëm ata që ndjekin kishat e miratuara nga shteti, si Lëvizja Patriotike Katolike dhe Lëvizja Protestante “Three-Self”.
Aktivistët e të drejtave dhe studiuesit vlerësojnë se dhjetëra miliona të krishterë të tjerë ndjekin kisha të paregjistruara, të njohura si “kisha shtëpie”, që nuk ndjekin ideologjinë e shtetit.
Këto kisha janë prekur nga përpjekjet e qeverisë për të kontrolluar grupet fetare. Godina të kishave janë shembur, kryqe janë hequr nga hapësirat publike, dhe materialet fetare janë kufizuar, përfshirë ndalimin e disa aplikacioneve të krishtera.
Në vitet 2005 dhe 2018, qeveria kineze rishikoi dhe ashpërsoi rregullat për grupet fetare. Në vitin 2016, presidenti Xi Jinping kërkoi “sinicizimin” e fesë. Sinicizimi është një term që përdoret për të përshkruar procesin e përshtatjes së një kulture, ideologjie, feje apo institucioni me karakteristikat dhe vlerat e kulturës kineze.
Kisha si Zion u prekën veçanërisht nga rregullat e vitit 2018, që kërkonin miratim shtetëror për adhurimin publik. Shumë prej tyre u detyruan të ndalonin aktivitetet publike, të kalonin në shërbime online, ose të mbylleshin.
Muajt e fundit kanë sjellë sinjale të një shtypjeje të re. Në maj, pastori Gao Quanfu u ndalua për “përdorim të aktiviteteve supersticioze për të minuar zbatimin e ligjit”. Në qershor, disa anëtarë të Kishës Linfen Golden Lampstand u dënuan me vite burg për mashtrim, akuza që grupet e të drejtave i cilësuan si të rreme.
Në shtator, autoritetet prezantuan një kod të ri sjelljeje për personelin fetar online, që lejon vetëm grupe të licencuara të mbajnë predikime në internet, një përpjekje për të kufizuar kishat e nëndheshme.
Sipas Drexel, anëtarët e Kishës Zion janë pyetur gjithnjë e më shpesh nga policia. Shumë e panë këtë si paralajmërim për një goditje, por pak e prisnin që të ishte kaq e gjerë.
Të premten dhe të shtunën e kaluar, autoritetet kineze nisën një operacion të gjerë në të paktën 10 qytete, përfshirë Pekinin dhe Shanghain. Përveç Jin, i cili u arrestua në Beihai, u ndaluan edhe pastorë të tjerë, drejtues dhe anëtarë të kongregacionit.
Ambasada kineze në Londër tha për BBC: “Qytetarët kinezë gëzojnë lirinë e besimit fetar në përputhje me ligjin. Ndërkohë, të gjitha grupet dhe aktivitetet fetare duhet të respektojnë ligjet dhe rregulloret e Kinës.”
Ministria e Jashtme kineze deklaroi më herët këtë javë se “kundërshton me forcë ndërhyrjen e SHBA-ve në punët e brendshme të Kinës me çështje të ashtuquajtura fetare”, pas kritikave të Sekretarit amerikan të Shtetit Marco Rubio për arrestimet në Kishën Zion.
