Ditën e sotme është zhvilluar një konferencë me rastin e 100-vjetorit të vendosjes së marrëdhënieve diplomatike midis Shqipërisë dhe ShBA.
Ambasadorja amerikane Yuri Kim tha se mes dy vendeve ka një lidhje të pathyeshme. Ajo u shpreh se Shqipëria është shembulli se si një vend mund të dalë nga shtypja dhe të kontribuojë për botën.
Po ashtu, Kim tha se dy vendet po punojnë për dy projekte të mëdha energjetike që do ta bëjnë Shqipërinë një lojtar kyç në arkitekturën e energjetikës.
“Jam e kënaqur që kam mundësi të jem me ju ndërsa përkujtojmë këtë ngjarje historike të marrëdhënieve diplomatike e cila ka mundur të vazhdojë edhe në ditë më të errëta të diktaturës dhe ku popujt tanë ja mbajtur të ndarë. Jemi krenarë që kemi qëndruar pranë popullit shqiptar gjatë këtyre kohërave. Dhe kemi festuar së bashku me popullin shqiptar në vitin ’91 kur populli shqiptar zgjodhi me vullnet të lirë një rrugë të re demokratike. Shqiptarët janë bërë një model se si një vend mund të dalë nga shtypja dhe të kontribuojë për botën. Vitin e kaluar mikpritët afro 2500 afganë duke i treguar sërish besën shqiptare dhe duke i mbrojtur ata në nevojën më të madhe Ne po bëjmë kaq shumë gjëra së bashku anembanë botës jo thjesht në rajon. Për herë të parë në histori, ushtria e SHBA ka një prani. Po punojmë për dy projekte të mëdha energjetike që do ta bëjnë Shqipërinë një lojtar kyç në arkitekturën e energjetikës që ne po përpiqemi të ndërtojmë së bashku. Kjo ka për të na ndihmuar që të çlirohemi nga shtypja dhe zhvatja e rusëve. Ne jemi duke punuar bashkarisht në KS të OKB. Jemi bashkëpenëmbajtës për çështjen më të ngutshme në botë, për Ukrainën. Së bashku jemi duke punuar për të ndërtuar demokracinë dhe për të luftuar korrupsionin. Po punojmë çdo ditë për të mbështetur hyrjen e Shqipërisë në BE”, tha Kim.
/a.r
