Ish-kampioni i kick-boxing, Ivan Jurçeviç është konsideruar si një ndër heronjtë e Këlnit, i cili shpëtoi disa vajza nga sulmet seksuale të emigrantëve, mbrëmjen e ndërrimit të viteve në Këln të Gjermanisë. Jurçeviç, 44 vjeç, ka rrëfyer për “Daily Mail” se si i shpëtoi vajzat nga kthetrat e refugjatëve.
“Ishin katër djem të rinj, rreth 20 vjeç. Flisnin arabisht. Më thanë që vajzat që kishin kapur ishin të tyret dhe nuk duhet të fusja hundët. Vajzat vishnin xhinse dhe pallto, asgjë provokuese. U thashë të fshiheshin pas meje. Anëtari më i fortë i bandës u sul drejt meje me një shishe qelqi në dorë. E godita me shkelm në gjoks, duke e shtrirë përdhe. Më pas u përlesha me tre të tjerët. U larguan duke më thënë se do ktheheshin të më vrisnin”, deklaroi Jurçeviç.
