Ministri i Shtetit për Çështjet Vendore, Bledi Çuçi zhvilloi sot një takim në Strasburg me Zv/Sekretaren e Përgjithshme të KiE-së, Gabriella Battaini-Dragoni. Në këtë takim Ministri Çuçi u shoqërua nga Ambasadorja, Ardiana Hobdari.
Zv/Sekretarja e Përgjithshme, Battaini-Dragoni vlerësoi me nota mjaft pozitive punën e kryer nga Ministri Çuçi dhe bashkëpunëtorët e tij, në drejtim të realizimit të reformës administrativo-territoriale në Shqipëri.
Rasti i Shqipërisë, vijoi ajo, përfaqëson një model suksesi për partnerët kryesorë të vendit tonë në procesin e kësaj reforme, KiE dhe BE. Është tejet e rëndësishme, theksoi ajo, që Shqipëria ka shënuar progres, duke patur rezultate të dukshme dhe të prekshme, pavarësisht vështirësive dhe sfidave nëpër të cilat ka kaluar reforma.
Ministri Çuçi shprehu falenderimet për ndihmën dhe asistencën e ofruar nga KiE në procesin e vështirë të realizimit të reformës administrativo-territoriale. Ky është një proces që ende nuk ka përfunduar, vijoi Ministri, pasi faza e implementimit është po kaq e rëndësishme.
Në vijim, ai bëri një përmbledhje të shkurtër të rezultateve kryesore të reformës administrative, të stadit aktual, si dhe hapat që do të ndërmerren në të ardhmen për plotësimin e paketës së reformës.
Ai nënvizoi faktin se reforma ka qenë prioritet i Qeverisë shqiptare dhe realizimi i saj u bë i mundur në sajë të bashkëpunimit dhe përfshirjes në proces të partnerëve ndërkombëtarë dhe të gjithë aktorëve të brendshëm. Reforma u realizua nëpërmjet një procesi të hapur, transparent dhe gjithpërfshirës, dhe ky është çelësi i suksesit dhe pranueshmërisë së reformës, theksoi Ministri.
Ndër masat që pritet të merren, Ministri Çuçi theksoi se është duke u hartuar projektligji për decentralizimin fiskal, në mënyrë që autoritetet lokale të kenë mjetet e duhura financiare për ushtrimin e aktivitetit dhe përmbushjen e misionit të tyre. Një aspekt tjetër, i përmedur nga Ministri Çuçi, ishte edhe pjesëmarja e publikut në vendimarrjen lokale, e cila është trajtuar me vëmendje dhe parashikuar në aktet ligjore dhe nënligjore të miratuara në kuadër të reformës.
Në fjalën e saj, Battaini-Dragoni nënvizoi se shembulli pozitiv i Shqipërisë meriton të promovohet dhe t’i jepet vizibiliteti i duhur. “Tashmë është i rëndësishëm miratimi i akteve të tjera ligjore, që do t’i garantojnë njësive lokale autonominë e nevojshme financiare për kryerjen e aktivitetit të tyre. Ashtu sikurse deri më tani, KiE do të vijojë mbështetjen ndaj Shqipërisë në të gjitha masat që do të merren gjatë fazës së plotësimit të paketës së reformës”, u shpreh znj. Battaini-Dragoni. Ajo përmendi çështjen e trajnimit të administratës lokale, si një nga aspektet ku bashkëpunimi me KiE-në mund të ofrojë një vlerë të shtuar.
Duke iu përgjigjur interesimit të Zv. Sekretares së Përgjithshme, Ministri Çuçi u shpreh se aktualisht janë duke punuar me BE-në dhe me Qeverinë zvicerane, duke hartuar një plan për trajnimin e administratës lokale. “Fokusi i punës sonë në këtë fazë, mbetet cështja e ofrimit të shërbimeve nga njësitë e reja të zgjedhura, si dhe mbulimi me efektivitetit i të gjithë territorit nën juridksionin e këtyre njësive, përfshirë edhe periferitë.” Në terma afatgjatë, Ministri Çuçi theksoi objektivin për dixhitalizimin e shërbimeve të njësive lokale, duke nisur me dixhitalizimin e arkivave.
Gjatë takimit me Zv/Sekretaren e Përgjithshme të KiE-së, Gabriella Battaini-Dragoni, Ministri Çuçi nënshkroi edhe Protokollin shtesë të Kartës Evropiane për Vetëqeverisjen Lokale mbi të drejtën për të marrë pjesë në çështjet e autoriteteve lokale (Protokolli i Utrechtit). Nënshkrimi i këtij protokolli është një rekomandim për Shqipërinë nga Kongresi i Autoriteteve Lokale dhe Rajonale nëpërmjet rezolutës Nr.349./a.m.
