Një numër i madh gazetarësh evropianë përballen me kërcënime në formën e dhunës psikologjike apo fizike, sulmeve kibernetike, me ndjekje penale dhe shumë prej tyre me vetëcensurimin nga frika e këtyre presioneve, denoncoi Këshilli i Evropës në një raport të publikuar sot.
Gjatë tre viteve të fundit, 40 për qind e gazetarëve të pyetur për këtë raport shprehen se kanë pasur ndërhyrje të pajustifikueshme në punën e tyre mjaft të rënda për ta që kanë ndikuar në jetën e tyre.
Vend kryesor në këto presione bën pjesë dhuna psikologjike, që përfshin 69 për qind të të pyeturve, pasuar nga sulmet kibernetike me 53 për qind. Intimidimi nga policia ka prekur 35 për qind të gazetarëve të pyetur dhe kërcënimi seksual 13 për qind.
Rreth 23 për qind e gazetarëve janë përballur me një arrestim, një hetim, kërcënime për ndjekje penale.
Gazetarët turq të pyetur janë gjithashtu më të shumtët që janë viktima të një mbikëqyrje të synuar, rreth 87 për qind e tyre.
Këto presione të ndryshme dhe frika për t’u përballur me to gjenerojnë stres duke arritur deri në depresion dhe paranojë dhe çojnë 31 për qind të gazetarëve të pyetur për të reduktuar mbulimin e tyre për disa çështje, 15 për qind për të braktisur këto çështje dhe 23 për qind për të mos publikuar disa informacione.
Nga ana tjetër, 36 për qind e të pyeturve shprehen se këto presione i bëjnë më pak të predispozuar për t’u vetcensuruar dhe më të gatshëm për të publikuar disa informacione.
Shumica e këtyre presioneve mbeten në çdo rast të panjohura nga policia pasi 57 për qind e gazetarëve që janë viktima nuk i denoncojnë./b.d
