Këshilli i Evropës ka kritikuar ashpër bojkotin e e parlamentit nga ana e opozitës. Në deklaratën e dy raporterëve Andrej Hunko dhe Joseph O’Reilly që ishin në Tiranë për vizitë, theksohet se bojkoti i parlamentit nga ana e opozitës do të sjellë pasoja negative për vendin.

KiE bën thirrje për dialog në mënyrë që të tejkalohet kriza dhe të vijohet më tej me implementimin e reformës në drejtësi. KiE e quan bojkotin e opozitës një strategji jo-korrekte.

“Forcat politike të angazhohen në dialog. Reforma në drejtësi ka nevojë për mazhorancën dhe opozitën. Çdo bojkot do të ketë pasoja negative për vendin. Vettingu i rëndësishëm për një sistem drejtësie të pavarur. Forcat politike nuk duhet të pengojnë reformën”, thuhet midis të tjerash në deklaratën e bashkëraporterëve.

Sa i takon reformës zgjedhore, KiE fajëson forcat politike si penguese të procesit.

“Ne përsërisim se çështja kryesore në lidhje me zgjedhjet në Shqipëri është mungesa e vullnetit politik mes aktorëve kryesorë politikë për zbatimin e Kodit Zgjedhor me qëllim të mirë dhe dëshira e tyre për të politizuar administratën zgjedhore. Ne do të mirëpresim çdo propozim i cili është në përputhje me standardet europiane, që do të rrisë besimin në zhvillimin e zgjedhjeve”, shprehen ata.

Po ashtu KiE thekson se duhet zbatuar me prioritet Dekriminalizimi për pastrimin e administratës nga personat me precedentë penalë.

/a.m.