Kiço Londo prezantoi dje kalendarin artistik të Teatrit Kombëtar Eksperimental. Në këtë kalendar edhe këtë vit do të përfshihen shfaqje për fëmijë, adoleshentë dhe të rritur. Londo punën e bërë një vit më parë në këtë teatër e konsideron të suksesshme, pasi numri i shfaqjeve që janë ngjitur në skenë (350) ka qenë i lartë. Madje, për shkak të kësaj “arritje”, Londo mendon se TKES është në një shinë tjetër, krahasuar me pjesën tjetër të 12 teatrove në mbarë vendin.
Ai nuk fajëson kënd, sepse e mendon të pamundur, që këto teatro të ecin në të njëjtën shinë me TKES-ën, por u kërkon, që të paktën të ecin në një shinë tjetër nga ajo, që kanë ecur deri më tani. “Unë mendoj se në përgjithësi Teatri Kombëtar shqiptar është një teatër i çakorduar, që nuk është në funksionin, misionin edhe në rentabilitetin e vet”. Për këdo që mund të pyes se çfarë bën stafi i TKES-s? Londo thotë se: “Ajo që bëjmë ne është fare e thjeshtë, por nuk është e thjeshtë për t’u realizuar. Kemi arritur që të fokusohemi në 3 pika. 1). Puna e aktorit me veten; 2). Puna e aktorëve me njëri-tjetrin dhe 3). Spektatori”.
Drejtori i TKES-ës ka vendosur që edhe këtë vit të përdorë të njëjtin slogan për të treguar, që ky teatër është ngritur. Bëhet fjalë për një gjel (shpend), i cili sipas Londos, e ndihmon një individ që të zgjohet herët në mëngjes. Por, që nuk zgjojnë vetëm të zotin nga gjumi, por edhe komshiun! Prandaj ai kërkon që Ministria e Kulturës, edhe ata që kanë në dorë fondet publike, t’i kushtojnë me tepër vëmendje këtij institucioni, që financat publike nuk i jep askund pa kontribut publik. Por, pavarësisht kësaj drejtori thotë që kësaj here kanë vendosur që mos të qahen, por të bëjnë 31 projekte artistike me buxhetin vjetor që marrin (fondi në total 200 mijë euro në vit, 50 mijë euro janë për shfaqjet). Londo i kujton Ministrisë së Kulturës edhe detyrimin e mbetur, 20 përqindëshin, që duhet t’u shlyejë artistëve. /shekulli/b.d
