Udhëheqësi Suprem i Iranit, Ayatollah Ali Khamenei, ka reaguar ashpër pas raportimeve për një sulm me raketa ndaj bazës amerikane Al Udeid, në Katar, e cila strehon mbi 10,000 trupa amerikane.
Përmes një postimi në platformën ‘X’, ai theksoi vendosmërinë e Iranit për të mos u përkulur përballë asnjë agresioni të huaj.
“Ne nuk kemi sulmuar askënd, nuk pranojmë agresionin e askujt, nuk do t’i nënshtrohemi agresionit të askujt: kjo është logjika e kombit iranian”, shkroi Khamenei.
Postimi i Liderit Suprem shoqërohej nga një imazh i krijuar artificialisht, ku shihet një flamur amerikan duke u djegur, ndërsa në sfond paraqitet një bazë ushtarake e shkatërruar, nën një shi raketash e flakësh.
Mesazhi vizual dhe retorika e ashpër duken të synojnë përforcimin e qëndrimit sfidues të Teheranit ndaj pranisë ushtarake amerikane në rajon, ndërsa tensionet në Lindjen e Mesme janë rritur ndjeshëm pas sulmeve të fundit, me komunitetin ndërkombëtar që bën thirrje për përmbajtje dhe shmangie të përshkallëzimit të mëtejshëm të situatës.
