Nga Eduard Zaloshnja
Në periudhën 1920-2016, Klubi i Futbollit Tirana fitoi dhjetra trofe kombëtare, si dhe regjistroi disa sukese ndërkombëtare (shumë legjenda të futbollit tiranas kanë kontribuar ndër vite për ato suksese). Por më 2016, ndodhi gjëma: Për herë të parë në historinë e vet futbollistike, KF Tirana ra nga kategoria, dhe iu desh të konkurojë me klube si Shën Kolli, Fushë Kruja, Gramshi, etj. (me gjithë respektin për to).
Pas rikthimit në kategorinë superiore më 2017, KF Tirana i ka bërë me infrakt në zemër tifozët e shumtë të saj (afërsisht 180 mijë vetëm në Tiranë, më rezultuan në një sondazh të paradokohshëm). Kështu, një sezon KF Tirana shpallet kampion, dhe tjetrin rrezikon të bjerë nga kategoria (vjet shpëtoi nga rënia prej kategorisë falë një autogoli të Pogradecit në ndeshjen play-off). Dhe aktualisht, rënia PËR HERË TË DYTË nga kategoria duket se ka gjasa të mëdha…
Në 15 vjetët e fundit, pronësia e aksioneve të klubit është ndarë 66% Refik Halili dhe 34% Bashkia e Tiranës. Pra, praktikisht, Halili ka qenë pronari kryesor i klubit në vitet më të errta të KF Tiranës…
Ditët e fundit u publikua një video e shkurtër e një bisede mes Presidentit të FSHF, Armand Duka, dhe biznesmenit Samir Mane (pasuria e tij neto llogaritet mbi 1 miliard dollarë nga revista amerikane Forbes). Në atë bisedë, Duka e inkurajoi Manen të investojë në sponsorizimin e një klubi futbolli. Dhe në rrjetet sociale ka shpërthyer diskutimi se, në fakt, bëhet fjalë për Klubin e Futbollit Tirana…
Halili është treguar intrasigjent deri më sot, kur është diskutuar për pronësinë e aksioneve të KF Tirana. Por biseda Duka-Mane, e publikuar gjerësisht, mund të jetë një sinjal se diçka po lëviz. Duke patur parasysh edhe investimin madhështor që pritet të bëhet në stadiumin “Selman Stërmasi” e përrreth, mund të pritet në vijim një marrëveshje Halili-Mane për aksionet e klubit.
Samir Mane ndoshta nuk merr vesh shumë nga futbolli, por deri më sot ka demonstruar se di të investojë me zgjuarsi dhe të caktojë njerëzit e duhur për ekzekutimin e projekteve të ndërrmara prej tij. Ndoshta ai mund të jetë aktualisht njeriu që mund të sjellë një ndryshim themelor te KF Tirana – që ta rikthejë në kohërat e lavdishme, e jo të konkurojë me klube si Shën Kolli, Fushë Kruja, Gramshi, etj. (me gjithë respektin për to).
