Kryetari i Partisë Demokratike, Lulzim Basha, foli për mediat pas mbledhje së grupit parlamentar. Kryedemokrati tha se në Shqipëri ka krizë korrupsioni dhe jo krizë energjetike.
“Kemi të bëjmë jo me një krizë energjetike, por me një krizë korrupsioni që ka nisur me vendimin që të zbrazur në verë kaskadën e Drinit dhe të shitej me 1 të 3 e çmimit që do blihej tani energjia, pasuria e Shqipërisë dhe e shqiptarëve. Kjo është arsyeja pse nuk është krizë energjetike, por korrupsioni. Në një vend normal, sot nga i pari i sektorit, përgjegjës politikisht tek drejtuesit famëkeq nga Çela i Durrësit e të tjerët duhet të ishin të paktën të pandehur.
Për ne këtë javë do të vazhdojë siç ka nisur me një ofensivë që do të ketë në qendër interesin bazik të qytetarëve shqiptarë. Kjo që po maskohet si krizë po përkthehet në rritje çmimesh të gjithanshme”, tha Basha.
Kryedemokrati u shpreh se situata nuk zgjidhet me fjalime dhe pseudopaketa. “E kanë shitur për 60-70 milionë Euro pasurinë e shqiptarëve dhe duan ta blejnë me trefish të çmimit”.
Basha i bëri thirrje institucioneve të drejtësisë që të hetojnë këtë rast. Kryedemokrati paralajmëroi një kallëzim në SPAK.
“Thirrje për institucionet e drejtësisë. Jeni para shumë testesh, por ky është një nga testet kryesore. E shkruar e zeza në të bardhë që kjo është krizë korrupsioni dhe jo energjie. Faktet janë publike. Do të sjellim kallëzimin në SPAK, thjesht për t’u hequr alibi atyre që kërkojnë alibi. Ata nuk janë aty veçse për të bërë detyrën. Ta kuptojnë që janë të rrethuar nga komoditeti i zyrës dhe i favoreve të zyrës, se ajo zyrë është krijuar për një funksion, për t’i dhënë fund pandëshkueshmërisë”, tha Basha.
Kryetari i PD-së komentoi edhe vendimin e mazhorancës për të mos miratuar një komision hetimor për çështjen Becchetti. Basha thotë se ky vendim është në shkelje të Kushtetutës dhe nuk do të kalojë në heshtje nga opozita.
“Kushtetuta është e qartë sa i përket komisioneve hetimore. Të fshihesh dhe të fshehësh dosjen ndoshta më të madhe korruptive nuk është në interes të Shqipërisë, por Edi Ramës. Shqiptarëve po ju merren 120 mln Euro për të shpërblyer Becchettin. Ta harrojnë se do të pranojmë në heshtje shkeljen e Kushtetutës dhe mosaprovimin e një komisioni hetimor që vetëm dëmton Shqipërinë”, tha Basha.
/a.r
