Ivan Tomiç, drejtor i Zyrës për Komunitete në Qeverinë e Kosovës, por edhe këshilltar i kryeministrit të Kosovës, Isa Mustafa, duket se para se të hyjë në politikë, ka qenë pjesë e MUP-it (Ministria e Punëve të Brendshme) të Serbisë. KosovaPress ka kontaktuar zyrën për media të Qeverisë së Kosovës, por ata kanë thënë se nuk janë në dijeni të këtyre pretendimeve. Ndërsa, i kontaktuar nga KP, Tomiç e mohon të ketë punuar ndonjëherë për çfarëdo institucioni të Qeverisë së Serbisë.
Burime të agjencisë brenda Qeverisë së Kosovës bëjnë të ditur se Ivan Tomiç ka punuar si pjesë e policisë serbe dhe për këtë është njoftuar zyra e kryeministrit, por se ata nuk kanë reaguar deri më tani. Tomiç mendohet se në Policinë e Serbisë ka punuar diku rreth vitit 2008. Ai ka pasur të postuar edhe në faqen e tij në rrjetin social “Facebook” një foto ku shihet me uniformë dhe me tre gishta të ngritur lartë. Këtë foto ai e ka hequr nga rrjeti social kohëve të fundit.
Gjithashtu, burime të KP-së brenda Qeverisë së Kosovës, bëjnë të ditur se Tomiç është i lidhur ngushtë edhe me rusët. Gjatë këtij viti, Tomiç ka qenë pjesë e një seminari në “Rusko-Srpski Humanitarni Centar” (Qendra humanitare Rusi-Serbi) në Nish, vend ky që nga shërbimet e huaja të inteligjencës njihet si qendër e spiunazhit rus në Serbi. Në këtë vend dhe gjatë kësaj kohe, Tomiçi ka qenë i vetmi serb nga Kosova, gjë që flet për rëndësinë që ka Tomiçi te rusët.
