Vijojnë kundërshtimet edhe brenda mazhorancës ndaj kryetarit të Bashkisë së Tiranës, Erion Veliaj, dhe mënyrës se si ai po administron punët e kryeqytetit.
Këshilltari për Politikën e Jashtme i kryeparlamentarit Ilir Meta, Ralf Gjoni, sulmon sërish projektin e Erion Veliajt për ndërtimin e këndit të lojërave në Parkun e Liqenit Artificial. Gjoni e cilëson si “paçavure betoni” këtë projekt, ndërsa bën thirrje për të vazhduar betejën kundër betonizimit. Këshilltari i kreut të LSI-së dhe Kuvendit, Ralf Gjoni, ka bërë thirrje për protesta kundër ndërtimit që po bën kryebashkiaku i Tiranës në parkun e liqenit.
Përmes një komenti në profilin e tij në Facebook, Gjoni shprehet se betonizimi i Parkut nuk është një mashtrim i atyre që protestojnë kundër këtij projekti, por është një projekt totalisht i vërtetë që po realizohet përmes një arrogance të paskrupullt të kryebashkiakut Erion Veliaj.
“Doja të prisja 2 prillin për ta postuar këtë foto, për t’ju sensibilizuar miqtë e mi se kjo paçavure betoni e hekurash që po ngrihet dhe thellohet dita-ditës në Parkun e Tiranës nuk është mashtrim – është totalisht prej vërteti. Ky nuk është thjesht rezultati i shëmtuar i idiotësisë së një arkitekti antimjedisor–totalisht i pandjeshëm ndaj nevojave të Tiranës, por mbi të gjitha, pasojë e një arrogance të paskrupullt e cila injoron legjislacionin, përbuz shoqërinë civile dhe tallet me ndjeshmërinë qytetare. Ndaj dhe beteja kundër çdo lloj ‘betonizimi’ duhet të vazhdojë…”,- shkruan këshilltari i kreut të LSI-së Ilir Meta, Ralf Gjoni.
Në fakt, ky nuk është rasti i parë që Gjoni, ka mbajtur qëndrim mjaft të ashpër ndaj kryetarit të Bashkisë së Tiranës në lidhje me protestat e shoqërisë civile apo dhe projektit të ngritjes së parkut të lojërave. Një muaj më parë, ai do të rreshtohej në radhët e pakënaqurve ndaj Veliajt, lidhur me arrogancën me të cilën Bashkia e Tiranës po administron debatin mbi Parkun e Liqenit dhe protestën e biznesit të vogël kundër taksave të reja të bashkisë.
Shqip
