Kryetari i këshilltarëve demokratë në Bashkinë e Tiranës, Leonard Olli e
konsideroi sot ‘një shfaqje të paprecedentë”, sulmin e kryebashkiakut Erion Veliaj, ndaj institucionit të Presidentit të Republikës.
Në një prononcim për mediat, Olli tha se “ai tashmë është shndërruar në një kamikaz të Edi Ramës” dhe se “tentativa e tij për intimidimin dhe krijimin e këtij rasti të paprecedentë është një prapavijë politike”.
“Kërcënimi i hapur, që bëri se do të përndjekë çdo gjyqtar apo çdo punonjës të institucioneve të tjera shtetërore, që dalin kundër tij, është shenja më e mirë që kemi të bëjmë me një element antishtet dhe antiligj, antisistem. Ai po përpiqet të intimidojë sistemin e drejtësisë për të mbuluar skandalet që pasojnë njëri-tjetrin dhe aferat e tij korruptive”, deklaroi kreu i këshilltarëve demokratë në bashkinë e Tiranës. (javanews.al /r.a)
