Ministri i Punëve të Jashtme Ditmir Bushati mori sot pjesë në takimin e posaçëm të Këshillit Kombëtar të Integrimit Evropian, kushtuar prioriteteve të Shqipërisë në kuadër të Procesit të Berlinit si dhe të pritshmërive për Samitin e radhës së vendeve të Ballkanit Perëndimor, i cili këtë vit do të mbahet nën kryesimin e Austrisë, në Vjenë në fund të muajit gusht.
Gjatë fjalës së tij, Ministri Bushati theksoi se “Procesi i Berlinit, është një proces komplementar me procesin e integrimit evropian; në një farë mënyre ai përgatit afrimin e rajonit me nivelin ekonomik dhe me nivelin e integrimit të vendeve anëtare të BE-së”.
“Vizioni ynë politik është se stabiliteti në rajon dhe integrimi evropian nuk mund të jenë të qendrueshëm pa rritje të qendrueshme ekonomike. Për këtë arsye, Procesi i Berlinit duhet të konkretizohet me projekte të ndërlidhjes rajonale që kanë impakt ekonomik në rajon dhe ofrojnë përfitime të prekshme për qytetarët e vendeve tona”, u shpreh Ministri Bushati.
Referuar detyrave dhe angazhime në ndërmarra në konferencën e Berlinit vitin e kaluar, Shqipëria dhe vendet e rajonit kanë hedhur disa hapa cilësore dhe afatgjatë, prej të cilave mund të veçohen themelimi i pritshëm i Fondit të Ballkanit Perëndimor si dhe platforma që do të miratohet në Vjenë për të inkurajuar dhe mbështetur mobilitetin e të rinjve, programet e shkëmbimit dhe të trajnimeve profesionale, duke përfshirë forcimin e kapitalit njerëzor dhe përmirësimin e kapaciteteve profesionale në fusha si siguria energjetike, transporti, infrastruktura dhe turizmi.
Në përgjigje të pyetjeve të pjesëmarrësve të Këshillit mbi prioritetet e Shqipërisë për Konferencën e Vjenës, Ministri i’u referua nevojës së vendeve të rajonit për një paketë zhvillimore në formën e një kornize të posaçme financiare, në mënyrë që ndërlidhja e Ballkanit Perëndimor të bëhet realitet. “Në këtë kontekst, Shqipëria do të kërkojë një përqendrim të përpjekjeve të BE-së drejt një strategjie te re të ndërlidhjes energjetike të rajonit” u shpreh Ministri Bushati.
