Këshilli i Mandateve pranon kërkesën e Prokurorisë për deputetin Prenga
Këshilli për Rregulloren, Mandatet dhe Imunitetin në kryesinë e Kuvendit të Shqipërisë pasi ka dëgjuar përfaqësuesin e Prokurorisë së Përgjithshme dhe palën mbrojtëse si dhe vetë deputetin Armando Prenga u tërhoq rreth orës 20:51 për të marrë një vendim lidhur me kërkesën e prokurorisë. Vetëm 7 minuta më pas, Këshilli bëri të ditur se kishte vendosur për të pranuar kërkesën e Prokurorisë së Përgjithshme.
Një ditë pas ndalimit, Prokuroria e Përgjithshme i kërkoi Kuvendit autorizimin për arrestimin e deputetit socialist, Armando Prenga. Mbrëmjen e së dielës, Kryetari i Kuvendit thërriti mbledhjen e Këshillit të Mandateve dhe Imuniteteve, i cili pasi dëgjoi përfaqësuesin e Prokurorisë dhe avokatin e deputetit Prenga, vendosi të aprovojë kërkesën e Prokurorisë për hetimin e deputetit Prenga në gjendjen e arrestit.
Deputeti i Partisë Socialiste mbërriti rreth orës 19:30 minuta në Kryesinë e Kuvendit i shoqëruar nga forcat e policisë. Ai u shpreh para Këshillit të Mandateve se e gjitha kjo është një sajesë nga komisionerë të Partisë Demokratike, të cilët i njeh i gjithë qyteti.
“E gjithë kjo është një vorbull e ngritur ndaj familjes time për ta sulmuar atë. Nëse kam shkelur ligjin do të përballem me të”, ka thënë Prenga, ndërsa kërkoi që kjo ngjarje të shihet me përkushtim, “pasi duan ta promovojnë si çështje politike”, tha deputeti.
Në kërkesën drejtuar Kuvendit, kryeprokurori Adriatik Llalla ka deklaruar se, nga provat e administruara deri më tani gjatë fazës së hetimit, rezulton se deputeti Prenga dyshohet të ketë konsumuar veprat e mësipërme penale gjatë konfliktit të ndodhur me disa shtetas të tjerë, ngjarje e ndodhur mesnatën mes së premtes dhe së shtunës në qytetin e Laçit. Veprat, të cilat dyshohet t’i ketë kryer deputeti Prenga, janë me rrezikshmëri të lartë shoqërore dhe parashikohen si krime në Kodin Penal.
Duke argumentuar dyshimet e arsyeshme për kryerjen e këtyre veprave penale nga ana e deputetit Prenga, Prokuroria e Përgjithshme kërkon, me qëllim që t’i hapet rrugë një hetimi të plotë dhe të gjithanshëm nga organi i hetimit, dhënien e autorizimit nga Kuvendi për arrestimin e tij, bazuar në Kushtetutën e Republikës së Shqipërisë.
