Këshilli i Mandateve ka dalë me dy raporte lidhur me kërkesën e Prokurorisë e cila kërkon autorizim për arrestimin dhe kontrollin e banesës së ish-ministrit Saimir Tahiri, të cilin e akuzon për trafik droge në bashkëpunim me grupin Habilaj.
Mazhoranca ka rënë dakord që të vijojë hetimi ndaj Tahirit, si dhe t’i nënshtrohet kontrollit fizik. PS është shprehur kundër kërkesës për arrestim pasi i ka cilësuar provat të pamjaftueshme.
Ndërkohë, deputetët e PD dhe LSI kërkuan aprovimin e kërkesave të Prokurorisë. Të dy raportet e palëve do t’i shkojnë seancës plenare e cila do të marrë një vendim.
Në fund të mbledhjes ka pasur edhe disa reagime:
Nasip Naço i LSI: Në Kuvend do të shkojnë dy raporte, nga PS dhe nga PD. Opozita mbështet kërkesën e Prokurorisë Fjalën e fundit do ta thotë Kuvendi
Enkelejd Alibeaj i PD: PS votuan kundër dhënies së autorizimit për arrest, ata janë kapur nga krimi e mafia
Gent Strazimiri i PD: Nuk është korrekte që të ndahet kërkesa e Prokurorisë. Lgjërisht thuhet që nuk është ky Saimiri që kërkohet nga Guardia di Finanza.
Ulsi Manja i PS: Ishte e natyrshme që do kishim dy qëndrime, sepse ne si shumicë jemi të shqetësuar për të vërtetën, dhe këtë e kërkojmë te organet e drejtësisë, ndërsa opozita nuk ka hallin e drejtësisë, por hallin e pushtetit. Ndaj dhe do kishim dy qëndrime. Lidhur me kërkesën e Prokurorisë, ne e pranuam për dhënien e autorizimit për kontrollin e banesës dhe atë personal. Prokuroria është e lirë të vijojë me dinamikën e veprimit në funksion të çështjes, ndërsa lidhur me kërkesën për dhënien e autorizimit për arrestimin e Tahirit, ne çmojmë se kërkesa e prokurorisë nuk mbështetje në prova. Pra, prokuroria shqiptare është e lirë pas vendimmarrjes në Kuvend të vijojë hetimet me të njëjtën dinamikë, pavarësisht se kanë nisur vetëm 72 orë më parë, ne do e mbështesim prokurorinë deri në fund. Vetë Tahiri tha se është në dispozicion të Prokurorisë dhe nuk do largohet jashtë shtetit. Këto vendimmarrje pati shumica sot në Këshill.
***
15:05/ Ka rinisur mbledhja e Këshillit të Mandateve i cili pritet të hartojë raportin, apo raportet nëse palët nuk bien në qëndrime të njëjta, lidhur me kërkesën e Prokurorisë së Krimeve të Rënda e cila kërkon autorzim për arrestimin e ish-ministrit Saimir Tahiri.
Fillimisht PD kërkonte mbajtjen e mbeldhjes me dyer të hapura për publikun, por kjo u hodh poshtë nga socilaistët të cilët referuar rregullores por edhe precedentëve në të shkuarën, kërkuan zhvillimin e mbledhjes me dyer të mbyllura për raportin final që do t’i përcillet Kuvendit.
PD u tërhoq nga kërkesa për zhvillimin e mbledhjes së hapur, dhe tashmë raportohet rinisja e mbledhjes.
Sipas të gjitha gjasave palët mund të dalin me dy raporte të ndryshme të cilat do të hidhen në votim në seancën plenare./a.m.
