Këshilla e “Trumpit rus”: Votoni për Donald, Hillary do të nisë luftë bërthamore

Amerikanët duhet të votojnë Donald Trump si president muajin tjetër, ndryshe rrezikojnë një luftë bërthamore. Kështu mendon aleati ultra-nacionalist rus i presidentit Vladimir Putin.
Vladimir Zhirinovski, i cili pëlqen ta krahasojë veten me kandidatin republikan në SHBA, është një deputet veteran që njihet për retorikën e fortë. Ai deklaroi në një intervistë për Reuters se Trump është i vetmi që mund të ulë tensionet e rrezikshme midis Moskës dhe Uashingtonit.
Sipas Zhirinovskit, Hillary Clinton mund të nisë Luftën e Tretë Botërore.
Shumë rusë e konsiderojnë Zhirinovskin si një figurë kllouni, i cili bën deklarata të forta për të tërhequr vëmendje, por ai shihet gjerësisht edhe si një shërbëtor besnik i politikës së Kremlinit, shpesh i përdorur për të përhapur ide radikale, për të testuar reagimin e publikut.
“Marrëdhëniet midis Rusisë dhe SHBA nuk kanë qenë kurrë më të këqija. E vetmja mënyrë për t’i përkeqësuar është fillimi i luftës”, thotë Zhirinovski, nga zyra e tij e madhe në katin e dhjetë të Dumës, dhoma e ulët e parlamentit rus.

“Amerikanët që do të votojnë për presidentin më 8 nëntor duhet ta kuptojnë se po votojnë për paqe në planetin Tokë nëse zgjedhin Trumpin. Por, nëse votojnë për Hillary, do të ketë luftë. Do të jetë film i shkurtër, kudo do të ketë Hiroshima dhe Nagasaki”.
Komentet e Zhirinovskit vijnë në një moment mosmarrëveshjesh të mëdha mes Uashingtonit e Moskës për Sirinë e Ukrainën dhe pasi Shtëpia e Bardhë akuzoi Rusinë për një fushatë sulmesh kibernetike kundër organizatave të Partisë Demokratike.
Putin ka këmbëngulur se vendi i tij nuk është përfshirë në përpjekjet për të ndikuar mbi zgjedhjet presidenciale në SHBA.
Zhirinovskit i pëlqen të tronditë opinion publik liberal dhe vazhdimisht kritikon Perëndimin, të cilin ai dhe nacionalistë të tjerë rusë e konsiderojnë si dekadent, hipokrit dhe të korruptuar politikisht.
Stili i tij luftarak, i ngjashëm me atë të Trumpit, bën që të sigurojë mjaft kohë televizive dhe miliona vota në zgjedhjet ruse, sidomos nga klasa punëtore, që përbën bazën e përkrahjes edhe për kandidatin republikan në SHBA.
Zhirinovski një herë propozoi bllokimin e shumicës së muslimanëve nga Rusia jugore përmes një gardhi me gjemba, njësoj si thirrjet e Trumpit për ndërtimin e një muri në kufirin mes SHBA dhe Meksikës.
Zhirinovski, i cili thotëm se është takuar me Trump në New York më 2002, mburret me ngjashmëritë që ka me bizn esmenin amerikan. Ata janë thuajse moshatarë, flasin gjuhë të ashpër dhe vendosin vendin e tyre të parin. Zhirinovski madje ka thënë se dëshiron të bëjë një test DNA-je, për të parë nëse ka lidhje gjaku me Trump.
Por ndryshe nga Trump, miliarder i pasurive të patundshme, i cili e mban veten si kandidati anti-sistem pa të kaluar politike në garën presidenciale, Zhirinovski është një politikan i konsumuar, i cili gjendet në Duma prej më tepër se dy dekadash.

Edhe Putin e ka lavdëruar Trumpin si “shumë të talentuar”, ndërsa kandidati republikan ka thënë se shefi i Kremlinit është lider më i mirë se presidenti amerikan Barack Obama. Clinton e ka akuzuar Trumpin si shumë të lidhur me Putin dhe ka vënë në pikëpyetje interesat e tij të biznesit në Rusi.
Në të tjera komente që kanë kën aqur Moskën, Trump ka ngritur pyetje për dobinë e NATO-s për Uashingtonin dhe ka folur me nënkuptim për aneksimin e Ukrainës nga Rusia më 2014, duke lënë të kuptohet se SHBA nën presidencën e tij do të ndiqte një politikë të jashtme më të izoluar.
“Atij nuk i bëhet vonë për Sirinë, Libinë dhe Irakun dhe pse dreqin duhet që Amerika të ndërhyjë në këto vende? Dhe Ukraina. Kujt i duhet Ukraina?”, thotë Zhirinovski, i cili thotë se ka qenë mik me Saddam Hussein e Muammar Gaddafin, për vdekjen e të cilëve ende ankohet.
“Trump do të ketë shansin e shkëlqyer t’i bëjë marrëdhëniet më paqësore. Ai është i vetmi që mund ta bëjë”, thotë, duke shtuar se Trump mund të fitojë edhe çmimin Nobel për Paqen.
Ndërsa për Clinton, Zhirinovski e krahason me një “vjehrrë të keqe” dhe thotë se periudha e saj si Sekretare Shteti më 2009-2013 tregon se nuk është e përshtatshme për të udhëhequr vendin.
“Ajo është e uritur për pushtet, ajo mendon se Amerika është vend i veçantë. Kjo është e rrezikshme. Ajo mund të nisë luftën bërthamore”, thotë Zhirinovski. “Amerikanët duhet të votojnë Trumpin, sepse burrat kanë drejtuar për miliona vjet. nuk mund të rrezikosh duke lënë një nga vendet më të pasura e të fuqishme të udhëhiqet nga një grua”.
Për komentet e Trumpit më 2005 ndaj grave, Zhirinovski është shpërfillës: “Kudo në botë burrat thonë ndonjëherë gjëra të tilla, në biseda me shokët e tyre. Ne duhet të shohim vetëm cilësitë e tij në biznes e politikë”.
Ndonëse Putin e Trump nuk janë takuar kurrë, Zhirinovski beson se ata mund të vendosin një lidhje të fortë bashkëpunimi, duke shtuar: “Fitorja e Trumpit do të ishte dhuratë për njerëzimin. Por nëse fiton Hillary Clinton, ajo do të ishte presidentja e fundit e SHBA”.
Reuters/d.i.