Historia e zhdukjes së biznesmenit italian, Davide Pecorelli, ngjan me një roman triller. Një ditë më parë ai dëshmoi se për disa muaj kishte qëndruar në një komunitet murgjërish, në Medjugorie, në Bosnjë Hercegovinë.
Shumëkush ngriti dyshime për arsyen se përse inskenoi vdekjen e tij e për t’u fshehur në një vend që konsiderohet i shenjtë, i njohur në mbarë botën si “Lurda e Ballkanit”, vend ku virgjëresha Mari iu shfaq përsëri 6 vegimtarëve 40 vite më parë.
Në vitin 2013, Papa Françesku autorizoi shtegtimin në Medjugore, duke u shprehur se “në Medjugore është Hiri i Tënzot. Ka njerëz që kthehen në Udhën e HYJIT”. Por, Davide Pecorellin nuk e shtyu besimi për të udhëtuar drejt Medjugores. Sipas mediave italiane, ai shkoi në vendin e shenjtë me ndihmën e një prifti që e kishte njohur në Shqipëri, për të kërkuar një thesar, të cilin duket se nuk e gjeti kurrë.
Sipërmarrësi italian pranoi përpara prokurorëve se në tetor kishte planifikuar të kthehej në shtëpi. Gjithashtu, ai bëri një pohim të rëndësishëm, kur tha se kishte kryer krime në Shqipëri.
Sipërmarrësi tha se po kërkonte monedha ari në Medjugore, një thesar të cilin nuk e gjeti kurrë. Pecorelli rrëfeu se përgjatë kohës që kishte qëndruar në Medjugore nuk kishte komunikuar me asnjë prej familjarëve. “Ata më panë kur u ktheva nga ishulli i Montecristos”, pohoi ai.
“Vendosa të zhdukem sepse kisha probleme ekonomike. Jam praktikisht i rrënuar”, pranoi biznesmeni në dëshminë 3-orëshe para prokurorëve. 45-vjeçari tha se në tetor kishte planifikuar të kthehej në shtëpi, ndonëse ai u zbulua këtë muaj pas një ngjarjeje aksidentale.
“Nuk kisha asgjë për të fshehur. Për ligjet që kam shkelur (në Shqipëri) u tregova gjithçka prokurorëve kur më morën në pyetje. Ju mediave, ju kërkoj të bëni detyrën sepse kam katër fëmijë, ndër ta tre minoren dhe një të rritur. Silluni në mënyrë profesionale dhe mos abuzoni nga situata”, është shprehur ai.
Dyshimet se biznesmeni italian kishte inskenuar “vrasjen” e tij ishin ngritur edhe më herët nga Policia shqiptare, ndërsa po verifikohen edhe dyshimet për dhunim të varreve. Dyshimet lindën sapo zjarrfikësja shoi flakët dhe në makinë u gjetën mbetjet kockore.
Davide Pecorelli mbërriti në Shqipëri më 3 janar të 2021. Fillimisht shkoi në Vlorë, më pas në Shkodër e në Pukë, ku qëndroi për dy netë. Gjurmët e tij u zhdukën në mesnatën e 6 janarit, ndërsa makina ku ai udhëtonte u gjet e djegur e brenda saj mbetje kockore, që kurrë nuk u vërtetuan që ishin të tijat. Për 8 muaj ai humbi kontaktet, por do të zbulohej pas një incidenti me varkë në ishullin e Montecristos, ku rrezikoi mbytjen.
g.kosovari
