Presidenti francez Francois Hollande ka deklaruar se Abdeslam duhet të merret në pyetje dhe të gjykohet në Francë, ndaj dhe ka bërë të ditur se qeveria e Parisit do të bëjë kërkesë për ekstradimin e terroristit.
“Për Salah Abdeslam ishte lëshuar një urdhërarrest europian. Nuk ka asnjë dyshim se autoritetet gjyqësore franceze do të dërgojnë një kërkesë ekstradimi”, ka deklaruar Hollande.
Ai e ka bërë këtë deklaratë në një konferencë të përbashkët për shtyp me homologun belg Charles Michel, në Bruksel, ku ka shprehur bindjen se, “autoritetet belge do të shprehen në favor sa më shpejt të jetë e mundur”.
Nga ana tjetër, kryeministri Michel ka bërë të ditur se bashkë me Abdeslam janë arrestuar edhe tre të dyshuar të tjerë si bashkëpunëtorë të tij. “Dy prej tyre kanë mbetur të plagosur, ndërsa i treti, mesa di unë, jo”, ka thënë Michel.
Ndërkohë, presidenti i Shteteve të Bashkuara, Barack Obama ka përshëndetur arrestimin e terroristit dhe ka uruar përmes telefonit liderët e dy vendeve.
“Presidenti Obama i ka telefonuar presidentit francez për ta uruar për përfundimin me sukses të operacionit kundër terroristëve”, ka thënë një zëdhënës i Elizeut.
Ndërsa kryeministri Michel ka njoftuar urimin e Obamës përmes një postimi në Twitter, bashkë me një foto që e tregon duke folur në telefon.TCh