Nga elektricist, shofer e rrobaqepës te arkëtar, inxhinier mjedisi apo specialist marketingu. Bizneset në vend kërkojnë me urgjencë 5 500 punonjës. Kriza veçanërisht e tre viteve të fundit ka kthyer vëmendjen e bizneseve si kurrë më parë te punonjësit, tashmë me paga më të larta dhe të shpërndara në profile të ndryshme.
Gertiola Çepani, përgjegjëse e Shërbimit të Punësimit në AKPA, shprehet për A2 CNN: “Nëse më përpara vendet më të shumta të lira ishin në industrinë përpunuese, tani kemi një ndryshim të trendit, ku kemi shumë vende të lira puna në fushën e teknologjisë së informacionit, hoteleri-turizëm, në fushën e ndërtimit. Pra, kemi një trend më ndryshe”.
Vendet e lira të punës janë shpallur tashmë edhe nga Agjencia Kombëtare e Punësimit dhe Aftësive, të ndara edhe sipas qyteteve: “Është Tirana. Kjo për shkak të përqendrimit më të lartë të bizneseve. Më pas vjen Durrësi, Fieri dhe Vlora, që kanë numër të konsiderueshëm vendesh të lira”.
Për të lehtësuar sa më shumë procesin e punësimit, tashmë aplikimet dhe e gjithë procedura mund të ndiqet “online” nga punëkërkuesi.
Çepani shpjegon: “Tashmë, punëkërkuesi mund të hapë llogarinë e vet në portalin “puna.gov.al”, të ngarkojë CV-në e tij dhe të aplikojë për vendin e punës pa ndërveprim fare të palëve të treta”.
Gjatë këtij viti, Agjencia Kombëtare ka punësuar me ndërmjetësim rreth 25 mijë punëkërkues, nga 70 mijë të tillë. Kjo shifër, në kushtet kur bizneset vuajnë për fuqi punëtore, tregon se kërkesa dhe oferta për vende pune nuk përputhen në tregun tonë për shkak të pagës dhe kushteve që ofrohen.
