Prokuroria e Fierit ka përfunduar hetimet dhe ka dërguar në gjykatë dy persona të akuzuar për prostitucion dhe shfrytëzim prostitucioni. Bëhet fjalë për shtetasin shqiptar S.M dhe një braziliane.
Hetimi nisi pas një kërkese nga Ambasada e Brazilit në Tiranë. Familjarët e shtetases braziliane kishin humbur kontaktet me të prej rreth një muaji dhe kërkuan ndihmë për gjetjen e saj.
Pas verifikimeve, Prokuroria Fier dhe Policia Gjyqësore identifikuan personin që kishte pasur kontaktet e fundit me të dhe nisën hetimet.
Sipas Prokurorisë, shtetasja braziliane kishte hyrë në Shqipëri në shtator të vitit 2025 dhe dyshohet se ushtronte prostitucion në Tiranë, Golem dhe Lushnje.
Nga hetimet rezultoi se S.M. dyshohet se e kishte ndihmuar duke i siguruar klientë, duke negociuar pagesat dhe duke përfituar nga kjo veprimtari.
Provat e mbledhura përfshijnë deklarime, kontrolle të telefonave celularë, komunikime elektronike dhe materiale të tjera hetimore.
Shtetasja braziliane u gjet në një banesë në fshatin Karbunarë të Bashkisë Lushnje, gjatë ndërhyrjes së Policisë Gjyqësore. Prokuroria Fier thekson se vijon punën për hetimin e rasteve që lidhen me shfrytëzimin dhe trafikimin e qenieve njerëzore.
