Policia e Kurbinit ka bërë të ditur sot arrestimin e një shtetasi të shpallur në kërkim ndërkombëtar, me qëllim esktradimin e tij drejt Italisë.
Personi në fjalë, banues në Laç, ka kryer disa vjedhje dhe është dënuar me 14 vjet e tetë muaj burg në Venecia, për “vjedhje me pasoja të rënda”.
Ai është dënuar dy herë në periudha të ndryshme për vjedhjet në shtetin fqinj, ndaj mund të konsiderohet pa frikë si një “skifter” i specializuar në grabitje.
Nga strukturat e Komisariatit të Policisë Kurbin në bazë të informacioneve të marra në rrugë operative u bë e mundur identifikimi , lokalizimi dhe arrestimi provizor me qëllim ekstradimin drejt Italisë të shtetasit Denis Prodani (i cili përdorte gjithashtu emrat Gentian Lisi, Gentian Gjonaj dhe Bledi Gjonaj), 40 vjeç, banues në Laç.
Ky shtetas rezulton i shpallur në kërkim ndërkombëtar nga Interpol Roma.
Autoritetet Gjyqësore Italiane kanë lëshuar me datë 04.07.2005 ndaj tij, masën e sigurisë “Arrest me burg”, kryerjen e veprave penale “Vjedhje me pasoja të rënda”, të parashikuar nga Kodi Penal Italian.
Gjithashtu nga Prokuroria e Përgjithshme Pranë Gjykatës së Apelit në Venecia, është nxjerrë urdhri i datës 15.11.2017 , ndaj shtetasit të lartpërmendur i cili ka për të kryer dënimin me 14 vjet, 8 muaj dhe 28 ditë burgim për veprat penale “ Vjedhje” dhe “Vjedhje e rënduar”.
Materialet i kaluan Prokurorisë së Rrethit Gjyqësor Kurbin për veprime të mëtejshme./a.m.
