Kërkesat e çmendura të futbollistit nga Bregu i Fildishtë Gervinho, i cili luan për Romën, kanë bërë që të hidhet në erë kalimi i tij tek klubi arab i Al Jaziras. Ndërkohë që dy klubet kishin rënë dakord për çmimin e shitjes së tij, rreth 13 milion euro, kanë qenë bisedimet e futbollistit me Al Jazira, të cilat i kanë lënë gojëhapur drejtuesit e klubit arab.
Gervinho u ka thënë atyre se përveç rrogës së majme, ai pretendon që të ketë edhe një mega-vilë ku të sistemojë familjen e madhe që mban pas vetes, një helikopter në dispozicion, si dhe një plazh privat. Ai ka thënë gjithashtu se dëshëron që të ketë në dispozicion një numër të papërcaktuar biletash ajrore për në Bregun e Fildishtë.
Një drejtues i Al Jazira i ka quajtur “të turpshme” kërkesat e Gervinhos dhe gjithçka duket se ka dështuar për shitjen e tij. Kjo gjë ka nevrikosur jo pak drejtuesit e Romës, të cilët e kanë njoftuar që të jetë i gatshëm të rinisë stërvitjen me shokët, pas pak ditësh. Por deri tani Gervinho nuk është bërë i gjallë. Ai nuk gjendet askund.
