Rinisja e transportit publik ditën e hënë, duket se nuk do të ndodhë. Ky vendim është marrë nga Shoqata e Transportit publik ditën e sotme, ku përfaqësuesit e saj deklaruan se nuk i plotësojnë kushtet.
“Për sa kohë kemi këto kushte, të gjitha kompanitë në transportin publik, janë të paafta për të filluar këtë shërbim. Të gjithë operatorët e transportit publik mezi presin rifillimin e shërbimit. Nevoja për të operuar të gjitha subjekte e kanë shumë të madhe. Është e pamundur të respektohet ai protokoll që ne kemi marrë, nga mediat, në një mjet të transporti qytetas apo ndërqytetës”, deklaruan ata.
Po ashtu thanë se nuk kanë marrë ende protokoll zyrtar, duke ngritur si problem edhe rolin e fatorinos.
“75% e ngarkesës, do të jetë shumë e vështirë të operohet me faturino. Ditën e hënë nuk ka nisje të transportit publik, është vendimi i shoqatës për transportin qytetas e ndërqytetës në këto kushte është e pamundur”, deklaruan përfaqësuesit e Shoqatës së Transportit publik.
Për disa ditë me radhë përfaqësuesit e shoqatës së transportit kanë protestuar si dhe kanë drejtuar katër kërkesa për shtetin: Heqjen e akcizës; Zbritjen e TVSH-së në shitje; Rimbursim për reduktim të kapacitetit dhe rimbursim për kategoritë që e përfitojnë falas shërbimin.
/a.r
