Sa herë që mes Shqipërisë dhe Greqisë ndizen debatet rreth çështjeve të ndryshme, ai që i “hedh benzinë zjarrit” është gjithmonë Panos Kammenos, Ministri i Mbrojtjes i Greqisë i cili është kryetar i partisë së ekstremit të djathtë “Grekët e Pavarur”. Kammenos është ministri që pak kohë më parë u shfaq me uniformë ushtarake në kufirin me Shqipërinë dhe jepte deklarata force. Referuar prishjes së disa godinave në Himarë, si dhe deklaratve të Ramës, ai i ka cilësuar “disa lëvizje që bëhen rreth minoritetit grek në Shqipëri”.
Ai ka shkuar edhe më tej kur thotë se “Rama ka përballë shumicën e popullit shqiptar”. Kammenos aludon se shqiptarët po kërkojnë shtetësi greke.
“Është e vërtetë se në nivel deklaratash verbale zoti Rama është provokues. Dhe paralelisht, edhe disa lëvizje që bëhen rreth minoritetit. Mirëpo, konsideroj se Rama ka përballë shumicën e popullit shqiptar, edhe njerëz që kanë qenë emigrantë në Greqi, njerëz që kanë lidhje me Greqinë, njerëz që kërkojnë nënshtetësinë greke. Dhe konsideroj se do ta marrë përgjigjen nga populli shqiptar për këtë sjellje ekstremiste ndaj vendit tonë”, tha ai.
Ai nuk ka kursyer edhe tonet kërcënuese ndaj Shqipërisë.
“Konsideroj se përpjekjet nga elementë ekstremistë, për të krijuar probleme me minoritetin grek të Epirit të Veriut, të vetmin rezultat që do të mund të kenë është izolimi i Shqipërisë. Dua t’ju them se kur takohemi jashtë shtetit, në nivel deklaratash, (shqiptarët) janë shumë të kujdesshëm. Shqipëria, megjithëse nuk ka flotë detare, dërgoi një anije në përbërje të SNMG2 në detin Egje, si pjesë e operacionit të përbashkët të NATO-s. Dhe asnjëherë deklaratat që bëhen në nivel të NATO-s nuk janë si deklaratat publike të zotit Rama”.
Ai flet edhe për mbërritjen e avionëve grekë për shuarjen e zjarreve, të cilët kryen mision vetëm në zonat minoritare. Por, Kammenos kishte tjetër qëndrim. Ai tha se operuan jo vetëm në fshtarat e minoritetit, por në gjithë Shqipërinë, aty ku ishte e nevojshme.
Ministri grek i Mbrojtjes u pyet edhe për çështjen e shumë përfolur të shtatë rekrutëve shqiptarë që në fillim të vitit ishin fotografuar brenda një mjedisi ushtarak duke bërë shenjën e shqiponjës.
“Ata morën dënimet e parashikuara, si nga unë, edhe nga shefi i shtabit të përgjithshëm. Por duhet të dini se ai imazh që u prezantua nuk ishte i vërteti. Ata janë një përjashtim. Ka djem që paraqiten në ushtri dhe që nuk janë “vorioepirotë”, por janë nga familje krejtësisht shqiptare, prindërit e të cilëve erdhën në Greqi, lindën këtu dhe morën nënshtetësinë greke. Dhe janë ushtarë të shkëlqyer. E kryejnë detyrën e tyre dhe e shohin Greqinë si atdheun e dytë. Dua të jem absolutisht i drejtë. Shumica e tyre janë patriotë dhe ndihen grekë, si gjithë të tjerët”./a.m.
