Një 20-vjeçar është arrestuar nga Policia e Kosovës pasi është akuzuar se ka kërcënuar kryeministrin Albin Kurti përmes postimeve kërcënuese në rrjetin social “Instagram”.
Arrestimi u bë pas një hetimi të nisur më 7 janar 2025 për veprën penale të “kanosjes”, që lidhej me kërcënimet ndaj Kurtit dhe postimeve për dhunë të publikuara nga grupi i quajtur “Brigada Sever”.
Sipas Policisë së Kosovës, hetimet çuan në identifikimin e të dyshuarit, M. R., një mashkull kosovar lindur në vitin 2004, i cili u arrestua më 10 janar 2025 në Zveçan. Gjatë arrestimit, ai u mor në pyetje në prani të avokatit mbrojtës dhe gjatë kontrollit në banesën e tij u gjet dhe sekuestrua një armë gjuetie pa leje.
Përmes një njoftimi, zv/drejtori i Policisë së Kosovës për rajonin e veriut, Veton Elshani, konfirmoi arrestimin dhe tha se veprimi ishte bërë për shkak të kanosjes ndaj kryeministrit. Ndërkohë, prokurori kujdestar nga Prokuroria Themelore e Mitrovicës ka caktuar masën e ndalimit prej 48 orësh për të dyshuarin.
