Sergey Savelyev, i burgosuri që zbuloi video të torturave në burgjet e Rusisë thotë se është kërcënuar me vdekje dhe tashmë po kërkon azil në shtetin francez.
BBC shkruan se ai kaloi tetë vite në një burg rus dhe mblodhi fshehurazi video të torturave dhe rrahjeve të të burgosurve. I vogël në shtat, 31-vjeçari bjellorus thotë se tani mund të flejë pak më mirë, për herë të parë në javë. Ai ka kërkuar azil në Francë, pasi ka ikur nga Rusia duke pasur frikë për sigurinë e tij.
Ai tani e pranon lirisht se ishte dorëzuesi i më shumë se 1000 videove, grupit rus për të drejtat e njeriut Gulagu.net. Savelyev i mori videot teksa punonte në burg gjatë kohës së dënimit. Publikimi i tyre shkaktoi protesta në Rusi pasi u shfaqën në internet në fillim të këtij muaj.
Autoritetet ruse kanë deklaruar se kanë hapur hetime penale për tortura dhe sulme seksuale në burgje dhe kanë shkarkuar disa zyrtarë të lartë të burgut.
/a.r
