Ish-kreu i SHISH, Fatos Klosi i ftuar në studion e Report Tv për masat e sigurisë pas kërcënimit terrorist ndaj ekipit të Izraelit gjatë ndeshjes në Shqipëri, deklaroi se e gjitha ka qenë një dëshirë e grupit terrorist, pasi nuk kanë shanse për ta zbatuar në terren.
“Mendoj se më shumë ka qenë një dëshirë e tyre, pasi shërbimi shqiptar ka mjaft eksperiencë dhe nuk e bënin dot. Janë marrë masat që të identifikohen ata që po kthen nga lufta. Masat duhen marrë edhe në Shqipëri, por edhe pala tjetër të sillet si profesioniste, që të mos krijohet panik, pasi edhe paniku bën efektin e vet, duke krijuar një gjendje jo të arsyeshme. Nuk më duket se në Shqipëri ata e kanë terrenin e përshtatshëm” deklaroi Klosi.
Sipas Klosit, institucionet shqiptare janë të mobilizuara maksimalisht.
“Sulmet e Parisit u nisën nga Belgjika nga një lagje e populluar nga arabë, që nuk kontrollohen nga popullsia vendase. Në Shqipëri është e vështirë, nuk përbëjnë grupe të mëdha. Institucionet janë mobilizuar për t’i ndjekur, edhe komuniteti mysliman nuk i pranon, ata që janë vetëshpallur imamë. Shqipëria nuk e meriton të ketë probleme në këtë fushë, pasi ka bashkëpunim mes feve, prandaj them që KMSH duhet të punojë më shumë. Institucionet e sigurisë duhet të jenë sa më profesioniste. Përsa i përket përgjimeve, madje mendoj se edhe prekja e të drejtave të njeriut është një e keqe e domosdoshme, që të shmangen aktet terroriste. Kontrolli nuk është i vështirë dhe Shqipëria është në gjendje të parandalojë sulmet terroriste, pasi populli shqiptar nuk i mbështet’ përfundoi Klosi.
ma.me
