“Shtetet e Bashkuara nuk duhet ta marrin lehtë kërcënimin e Rusisë për përdorimi ne armëve bërthamore”. Ky ishte paralajmërimi që ka bërë drejtori i CIA-s, Bill Burns ditën e sotme.
“Duke pasur parasysh dëshpërimin e mundshëm të Presidentit Putin dhe udhëheqjes ruse, duke pasur parasysh pengesat me të cilat ata janë përballur ushtarakisht deri më tani, askush prej nesh nuk mund ta marrë lehtë kërcënimin e paraqitur për përdorimin e mundshëm të armëve bërthamore taktike ose armëve bërthamore me rendiment të ulët”, tha ai në komentet publike në Institutin e Teknologjisë në Gjeorgji.
Burns deklaroi se CIA po ndjek me vëmendje hapat e Moskës, por theksoi se ende nuk ka ndonjë shenjë se Rusia po përgatitet të ndërmarrë një hap të tillë.
“Ndërsa ne kemi parë disa qëndrime retorike nga ana e Kremlinit për kalimin në nivele më të larta të alarmit bërthamor, deri më tani nuk kemi parë shumë prova praktike të llojit të dislokimeve apo dispozitave ushtarake që do ta përforconin këtë shqetësim – por ne e shikojmë këtë me shumë vëmendje,”– tha Burns.
Megjithatë, në të njëjtat komente, Burns paralajmëroi se presidenti rus Vladimir Putin është bërë gjithnjë e më i izoluar dhe “oreksi i tij për rrezik është rritur ndërsa kontrolli i tij mbi Rusinë është shtrënguar”.
“Rrethi i tij i këshilltarëve është ngushtuar dhe në atë rreth të vogël nuk ka qenë kurrë në dyshim gjykimi apo besimi i tij kokëfortë, pothuajse mistik se fati i tij është të rivendosë sferën e ndikimit të Rusisë”, tha Burns./m.j
