Presidenti rus Vladimir Putin urdhëroi të premten që Rusia t’i përgjigjet me veprime të ngjashme një prove me raketë të realizuar kohët e fundit nga Pentagoni.
Shefi i Kremlinit i tha Këshillit të tij të Sigurisë Kombëtare se Rusia nuk mund të qëndrojë duarkryq, dhe se deklaratat amerikane për të instaluar raketa të reja në rajonin e Azi-Paqësorit prekin interesat thelbësore të Rusisë.
Ai ka urdhëruar Ministrinë e tij të Mbrojtjes të analizojë kërcënimin e paraqitur nga një test i ri raketash amerikane dhe të përgatisë një “përgjigje simetrike”.
Udhëzimet e Presidentit rus vijnë pasi Uashingtoni testoi një raketë të ndaluar dikur Tomahawk.
Pentagoni njoftoi të hënën se kishte testuar një raketë konvencionale kruz që goditi objektivin pas një fluturimi prej më shumë se 500 kilometrash.
Kjo është prova e parë e këtij lloji e SHBA që nga dalja e Uashingtonit nga pakti historik për raketat bërthamore me rreze të mesme veprimi.
Sekretari amerikan i mbrojtjes, Mark Esper tha kohët e fundit se është në favor të vendosjes së raketave me rreze të mesme veprimi në Azi. Ndërkaq, Presidenti Putin u ankua këtë javë se Shtetet e Bashkuara janë tani gati të instalojnë në Rumani dhe Poloni një raketë të re me bazë në tokë.
Shtetet e Bashkuara kanë thënë se nuk kanë plane të afërta për të instaluar raketa të reja në Evropë.
Kjo lloj arme u ndalua në bazë të marrëveshjes së Forcave Bërthamore të Ndërmjetësimit të 1987 (INF), e cila kufizoi përdorimin e armëve bërthamore dhe konvencionale me rreze të mesme, por që tani është prishur sio marrëveshje mes SHBA dhe Rusisë.
g.kosovari
