Gruaja në krye të LSI-së, Monika Kryemadhi, ka pretenduar se i është kërcënuar vajza, për çka është detyruar që ta çojë për shkollim jashtë shtetit, madje duke e akomoduar në një konvikt të izoluar(!).
“Vajzën e vogël e kam dërguar në shkollë jashtë me konvikt e izoluar, sepse nuk dua që ajo të rrezikojë, sepse duhet të garantoja jetën e vajzës. Unë jam kërcënuar në rrjetet sociale e jo vetëm”, deklaroi znj. Kryemadhi në Open të Eni Vasilit në TCH.
Por bashkëshorti i saj, presidenti Meta, i ndodhur paralel në një tjetër studio, te “Të Paekspozuarit”, tha se “nuk e ka idenë për cfarë fliste Kryemadhi” dhe se “ajo ka koncepte të ndryshme lidhur me kërcënimet”.
Deklaratën e saj, zonja në fjalë nuk e shoqëroi me asnjë të dhënë, detaj në trajtë prove, në funksion të të qënit sa më e vërtetë dhe bindëse në pretendimin e ngritur.
E nga ana tjetër, fakti që burrë e grua shfaqen në papajtueshmëri – e jo thjesht politike, pasi është fjala për kërcënimin e fëmijës së tyre – e bën më grotesk rastin.
Ndërkohë, një portal pranë tyre, deklarimin e znj.Kryemadhi e përcjell si fakt të padiskutueshëm, me referencë vetëm një deklaratë.
“Kërcënohet vajza e Ilir Metës”- është titulli.
Dhe ky nuk është precedenti i vetëm i viteve të fundit, ku mjafton një deklaratë – akuzë, e pashoqëruar nga asnjë fakt bindës, që më pas përtypet e ripërtypet nga mediat, duke u mbllaçitur me të pa i hyrë një analize të thjeshtë fare.
Mjaft të kujtohet akuza e Tom Doshit për Ilir Metën si porositës i vrasjes së tij të mbetur në tentativë, apo ajo më e vonshmja e një polici në dezertim që akuzonte deputetin Balla se i ka vënë pistoletën në kokë në Komisariatin e Fushë Krujës.
Në dy rastet, gënjeshtrat bëjnë muuu të përgënjeshtruara nga fakte të thjeshta e argumentime logjike, pa qenë nevoja për investigime të thella.
Dhe ja ku mbërrin tjetra; ajo që është kërcënuar vajza e çiftit Meta – Kryemadhi. E pohon bashkëshortja, por e përgënjeshtron bashkëshorti.
Dhe te portali i familjes, e më saktë “i familjeve”, definimi se Metës i është kërcënuar vajza, nuk shoqërohet nga kundratitulli përgënjeshtrues, referuar mohimit politiko – bashkëshortor të këtij të fundit – Vajza e Metës nuk është kërcënuar.
E duhet kujtuar se dhe në rastin e Tom Doshit që ngulte këmbë si mushka se Meta kërkon ta vrasë (nuk u tha të paktën se përse donte ta vriste), miku i tij Mark Frroku, për të cilin Toshi pretendonte se e kishte dëshmitar të planit për atentat, e mohoi diçka të tillë. (Tesheshi)
