Kryeministri i Kosovës, Albin Kurti, ka folur sot për strehimin e qytetarëve afganë në Kosovë. Në një deklaratë për mediat, Kurti u shpreh se Kosova ka qenë e gatshme për pranimin e afganëve dhe thotë se ka pasur një bashkëpunim me Shtetet e Bashkuara të Amerikës.
“Qytetarët kudo në botë jo vetëm që e meritojnë por edhe iu takon demokracia, liritë dhe të drejtat, dhe ne shpresojmë dhe urojmë më të mirën për qytetarët e Afganistanit”, tha ai.
Më tej Kryeministri sqaroi se puna për marrjen e emigrantëve ka nisur një muaj më parë dhe gjithçka është bërë pa zhurmë, ku është punuar për të pasur një operacion sa më të suksesshëm.
“Ka një muaj që Qeveria është në kontakt dhe bashkëpunim të rregullt me Shtetet e Bashkuara të Amerikës për të përgatitur në aspektin organizativ e strategjik, strehimin e një numri të refugjatëve afganë. Këtë punë tash e një muaj e kemi bërë pa zhurmë dhe me kujdes të veçantë pasi kjo është një çështje e dhimbshme njerëzore por edhe e sigurisë së veçantë”, deklaroi Kurti.
Kurti deklaroi se kjo është vetëm një pjesë e vogël e kontributit që mund të jap Kosova krahas mbrojtjes dhe mbështetjes që kanë dhënë SHBA-të për Kosovën.
/a.r
