Nga Artur Ajazi
Situata politike, ngjarjet e ditëve të fundit në disa qytete të vendit, (apo edhe në Kosovë) nxisin nevojë e rreshtimit dhe ndryshimit të tabllosë. Qytetarët shqiptarë, ndoshta kanë nevojë të ç’tensionohen, të kthehen nga qetësia, harmonia, e qeshura, e bukura, duke alternuar hallet dhe problemet e ditës me spaktakle, koncerte, festivale… Prej vitesh, Elbasani mbetet qyteti i festivaleve.
Brënda këtij viti në qytetin e ballakumeve dhe luleve, janë shfaqur dhe pritet të shfaqen deri në 31 Dhjetor 2023, edhe katër Festivale Kombetare dhe Nderkombetare, si ai i Ditës së Verës, i Teatrove Kombetare , i FestFolk me pjesëmarrje nga vendi dhe Europa, Festivali Kombetar i Harqeve, ku marrin pjesë orkestra nga 5 qytete të Shqipërisë dhe Mjeshtra të Muzikës nga Greqia.
Dy drejtuesit e Festivalit të rradhës, atij të Orkestrave dhe Harqeve , Klinsi Lala drejtori Teatrit “Skampa” dhe Mjeshtri i Madh Blerim Narazani, nuk fshehin risinë dhe suksesin që Qendra e Artit dhe Kulturës e qytetit, kanë arritur me spektakle të tilla. Nën kujdesin e Bashkisë dhe kryetarit Llatja, Qendra e Artit dhe Teatri “Skampa” Elbasan, kanë thyer monotoninë e qytetarëve, larg mërzisë dhe skenave të lodhshme të politikës, duke mbushur sallën me spaktatorë. Në Bashki dhe Qendrën e Artit pranë Teatrit “Skampa”, ka projekte të rëndësishme kulturore. Duke punuar në grup, drejtori Q.A. Klinsi Lala, ka arritur të marrë vëmëndjen e qytetarëve të çdo moshe, me shfaqjet dhe festivalet e organizuara.
Salla e Teatrit “Skampa”, është e pamundur të gjendet bosh. Aktorë, regjisorë, skenaristë, artistë, instrumentistë, drejtues orkestrash dhe teatrosh nga vendi dhe Rajoni, zgjedhin bashkëpunimin e tyre me Teatrin “Skampa”, si i vetmi institucion artistik që promovon dhe inkurajon talentet e reja. Interesimi qytetar për dramën, komedinë, festivalet, muzikën popullore dhe atë instrumentale, ka rritur optimizmin dhe shpresën për jetën, dhe pse jo, edhe për të ardhmen e fëmijëve të tyre.
Shkolla e Mesme Artistike “Onufri” në Elbasan prej 40 vitesh, mbetet model i arsimimit dhe perfeksionimit të telenteve të reja. Janë pikërisht mësuesit dhe profesorët e muzikës dhe Artit Skenik, ata që gërshetojnë mrekullisht punët dhe projektet për të sotmen dhe të ardhmen e talenteve të reja. Shkollat 9- vjeçare dhe ato të mesme, janë një burim i madh prurjesh drejt përzgjedhjeve të elementëve të rinj. Vëmëndja ndaj artit muzikor dhe atij skenik, janë prioritete të Bashkisë Elbasan, ndaj dhe Qendra e Artit dhe Drejtoria e Teatrit “Skampa” nuk rresht së njoftuari qytetarët për spaktakle dhe festivale.
“Atje ku ka muzikë, ka jetë, atje ku bëhet art, ka kulturë”- thotë një prej kompozitorëve me famë botërore Robert Schumann. Ndoshta kjo është arsyeja pse qytetarët, duhet ti kthehen muzikës, teatrit, festivaleve, për ti dhënë tjetër frymëmarrje jetës së përditshme, larg zymtësive që sjell “vardisja” dhe interesimi ndaj politikës.
Bravo elbasani
Keshtu vazhdoni