Pasi ushtria izraelite njoftoi hyrjen në fuqi të një marrëveshjeje armëpushimi dhe tërheqjen e trupave nga veriu i Gazës, mijëra palestinezë të zhvendosur kanë nisur të kthehen në këmbë drejt shtëpive të tyre shumica të shkatërruara. Pjesëmarrja e një numri të madh vendesh dhe organizatash ndërkombëtare në procesin e ndërmjetësimit nënvizon përpjekjet globale për të gjetur një zgjidhje të qëndrueshme për krizën humanitare në Gaza.
Në një rrëfim ekskluziv në një lidhje të drejtpërdrejtë me emisionin “Në kohë reale” në RTSH 1, Abdullah Xhabir, një shtetas shqiptar me origjinë palestineze, ndau historinë e tij prekëse dhe humbjen e djalit të tij në konflikt.
“Jam shtetas shqiptar por me kombësi palestineze, kam ardhur në Shqipëri para 31 viteve. Kur filloi lufta në Gaza ishim këtu ndërsa djalin e madh e kam në Tiranë bashkë me gruan. Kemi humbur shumë njerëz të dashur, kemi humbur shtëpitë tona, teksa qëndrojmë në çadra. Menjëherë që u bë marrëveshja njerëzit dolën nga kampi por të gjithë kanë nevojë për ndihmë”, u shpreh Abdullah Xhabir.
Ndër momentet më të rënda të jetës së tij, Abdullah përmendi ditën kur mësoi për vdekjen e djalit të tij, Ibrahimit. Rrëfimi i tij, përfshinte edhe humbjen e të afërmve të tjerë.
“Një ndër ditët më të vështira për mua ka qenë kur burri i motrës time po vdes ngadalë sepse nuk gjen ilaçe, apo kur vdiq nënë Fatija. Kulmin e ditëve më të vështira që kemi kaluar është ajo ditë kur një person erdhi dhe më tha se kanë gjetur trupin e Ibrahimit. Këto kanë qenë 4 ditët më të vështira i cili doli nga shtëpia për të sjellë ilaçin dhe kemi humbur komunikimin me të ndërsa ditën e 5 erdhi lajmi. Do të qëndroj për të gjetur varrin e djalit Ibrahimit”, tha ai.
