Pas fitores së thellë ndaj Partisë Demokratike në zgjedhjet parlamentare të 11 majit, kryeministri Edi Rama ka vendosur të dalë sërish në rubrikën e tij të preferuar online “Sy m’sy”.
Rama u shpreh se Shqipëria ka lajme të mira përsa i përket negociatave me Bashkimin Evropian, duke thënë se beson që së shpejti do të happen dhe grup-kapitujt e fundit.
“Kemi lajme të mira nga fronti i negociatave. Shpresojmë, besojmë që se shpejti do marrim lajmin e hapjes së një tjetër grup kapitulli. Sipas ambicies dhe planit, është të hapim e grup kapitujt e fundit, në mënyrë që t’i kemi të gjithë grup kapitujt e hapur”, tha ai.
Duke u ndalur tek Samiti i Komitetit Evropian të mbajtur në vend më 16 maj, ai u shpreh se ishte një sukses i jashtëzakonshëm, madje fantastik. Kreu i qeverisë dha dhe lajmin se kanë nisur punimet për samitin e NATO-s që do të mbahet në vendin tonë.
“Ndërkohë Samiti i Komitetit Politik Evropian ishte një sukses i jashtëzakosnshëm,. Fantastik do thoja pa ekzagjerim. Jehonë e të cilit në korridoret evropiane vazhdon. Kemi filluar punën e samitit të NATO-s. Në dukje ka kohë, por kjo është mënyra se si punohet”, tha ai.
Ky samit do të mbahet në kryeqytetin tonë në vitin 2027. Ky samit ka një rëndësi të madhe, pasi do të mbledhë në Tiranë të gjithë liderët e kësaj aleance, duke përfshirë këtu edhe Presidentin e Shteteve të Bashkuara të Amerikës, Donald Trump.
Gjithashtu Rama deklaroi se Shqipëria po përpiqet të jetë mikpritëse e eventit “The Globe Soccer Awards”, një ngjarje e rëndësishme për futbollin botëror.
“Jemi në diskutim për të sjellë në Tiranë, por jemi diskutuar edhe Durrësin e Vlorën si opsione, edicionin europian të The Globe Soccer Awards, pra të Çmimit të Globit të Futbollit.
Është një event i jashtëzakonshëm që mbahet në mënyrë të përvitshme për sa i përket edicionit global në Dubai dhe për edicionin europian organizatorët janë në diskutim me Madrid dhe me ne këtu në Shqipëri.
Kemi shumë arsye të besoj qe zgjedhja do bie mbi ne dhe do të jetë fantastike që çmimin e futbollistit më të mirë të vitit nga Globe Soccer Lamine Yaman, fjala vjen, t’ia japim këtu në Tiranë”, tha Rama.
