Të paktën dy SMS nga Belind Këlliçi i ka mbërritur shumicës së qytetarëve të Tiranës gjatë kësaj jave. Disa prej marrësve madje kanë shprehur revoltën e tyre publike në rrjetet sociale duke ngritur edhe pikëpyetjen se ku i ka gjetur numrat e telefonit kandidati i Sali Berishës dhe Ilir Metës?
Por ditën e sotme, nisur nga ky shqetësim, ka ardhur edhe reagimi nga Komisioneri që përgjigjet për mbrojtjen e të dhënave personale në Shqipëri.
Përmes një reagimi, Komisioneri për të Drejtën e Informimit dhe Mbrojtjen e të Dhënave Personale, Besnik Dervishi thotë:
“Ditët e fundit është konstatuar një dërgim masiv mesazhesh të një subjekti zgjedhor në drejtim të qytetarëve nëpërmjet shërbimit të telefonisë së levizshme.
Kjo veprimtari konsiderohet përpunim i paligjshëm i të dhënave personale dhe vjen në kundërshtim me parashikimet e ligjit nr. 9887/2008 “Për mbrojtjen e të dhënave personale”. Zyra e Komisionerit për të Drejtën e Informimit dhe Mbrojtjen e të Dhënave Personale ka vendosur në dispozicion të partive politike dhe të çdo subjekti zgjedhor, por edhe të gjithë publikut Udhëzuesin “Për përpunimin e të dhënave personale në kontekstin e fushatave zgjedhore”.
Në këtë dokument shpjegohet edhe më qartë qasja në raport me përpunimin e ligjshëm të të dhënave personale. Zyra e Komisionerit do të hetojë çdo rast të shkeljes së ligjit nr. 9887/2008 “Për mbrojtjen e të dhënave personale” nga çdo subjekt zgjedhor apo operator ekonomik.
Zyra e Komisionerit, gjithashtu, u bën thirrje të gjithë subjekteve zgjedhore të ndalojnë menjëherë çdo përpunim të paligjshëm të të dhënave personale”.
/a.r
