Komisioni Evropian publikon parashikimin ekonomik të vjeshtës për vendet anëtare dhe ato kandidate.
Sipas raportit, për Shqipërinë, Komisioni Evropian pret një forcim gradual të veprimtarisë ekonomike me ringjalljen e ciklit të investimeve. Politika monetare dhe konsolidimi fiskal parashikohet të vazhdojë me vendosmëri dhe norma e borxhit publik mund të nisë uljen gjatë vitit të ardhshëm, nga 72.4% të GDP-së këtë vit, në 72% gjatë 2016-ës dhe 70.3% në 2017-ën.
Komisioni Evropian parashikon për Shqipërinë një rritje ekonomike prej 2.7% gjatë 2015-s dhe 3.3% vitin e ardhshëm. Punësimi pritet të rritet në 1.7% këtë vit, 1.9% për 2016-n dhe 2.3% në 2017. Papunësia parashikohet në nivelin 17.5% këtë vit, 16.9% gjatë vitit të ardhshëm dhe 15.8% në 2017-ën. Pavarësisht kreditimit të dobët të biznesit, investimet private parashikohen të mbeten të forta.
Parashikimi për defiçitin sipas raportit rë Komisionit Evropian është 4% e GDP-së këtë vit, ndër të cilat 1.4% (e GDP-së) vlerësohen për shlyerjen e detyrimeve të prapambetura të qeverisë. Vendi parashikohet të arrijë kufirin e lejuar të defiçitit në BE prej 3% vitin e ardhshëm dhe kjo normë pritet të ulet në 2.1% gjatë 2017-s.
