Katër aksidente kanë ndodhur sot në zonën e Korçës, ku si pasojë janë plagosur 7 persona.
Në orët e pasdites në unazën e qytetit të Korçës, shtetasi I.B., duke drejtuar mjetin tip “Nissan”, dyshohet se ka përplasur dy këmbësore A.R., 19 vjeçe dhe P.N., 10 vjeçe, të cilat u dërguan për mjekim në Spitalin e Korçës, ku ndodhen jashtë rrezikut për jetën. Ndërsa drejtuesi i mjetit u shoqërua në polici.
Ndërkohë pak minuta më vonë, në aksin rrugor Ersekë-Korçë, pranë vendit të quajtur “Fushorja e Selenicës”, u përplasën mjetet tip “Ford” me drejtues shtetasin H.M., me mjetin tip “Benz” me drejtues shtetasin G.M.
Për pasojë janë dëmtuar drejtuesi i mjetit tip Benz si dhe pasagjeri në këtë mjet, shtetasi M.C.
Të plagosurit u transportuan për mjekim në Spitalin e Korçës. Ndërsa grupi hetimor po punon për zbardhjen e rrethanave të aksidentit.
Në orët e paradites u regjistruan edhe dy aksidente të tjerë.
Një i moshuar mbeti i plagosur si pasojë e përplasjes së dy automjeteve. Ndërsa 3 persona të tjerë u plagosën në aksin Korçë-Pogradec, dy prej të cilëve në gjendje të rëndë u dërguan në Spitalin e Traumës në Tiranë.
Paraprakisht dyshohet se shkak i aksidenteve është shpejtësia e lartë, ndërsa blutë e Korçës thonë se po punojnë për sqarimin e shkaqeve të aksidentit. /l.m
