110 mijë punonjës të administratës do të përfitojnë rritje page nga 1 Marsi i viti 2017. Një rritje page e cila do të variojë nga 7 % deri në 36 %. Në dokumentin zyrtarë që Ministria e Financave i ka dërguar Kuvendit thuhet se për punonjësit mbështetës të administratës ku përfshihen shoferët, rojet, sportelistët, operatorët, magazinierët rritja e pagës bazë minimale me 36. 3% ose me 8 000 lekë në muaj bëhet 30 000 lekë në muaj.
Paga bruto minimale në administratën publike shkon rreth 37 500 lekë në muaj duke llogaritur dhe shtesat mbi vjetërsinë në punë dhe arsimimin. Numri total i përfituesve nga rritja e pagës minimale në administratën buxhetetore për vitin 2017 është rreth 6900 punonjës dhe fondi i nevojshëm nga kjo rritje është rreth 1 miliard lekë në vit. Një tjetër rritje të pagës do të ketë edhe për punonjësit e ministrive dhe këshillit të ministrave nga 7 % deri në 10 %.Kështu sipas tabelave zyrtare kjo rritje do të përfshijë kategoritë nga sekretari i përgjithshëm i këshillit të ministrave dhe sekretarët e ministrive deri në nivelet e specialistëve.
Një tjetër kategori që do të përfitojë nga rritja e pagave me 10 % janë 34.630 mësues dhe kosto financiare shtesë për vitin 2017 është rreth 1.3 miliardë lekë. Edhe paga e mjekëve dhe infermierëve do të rritet me 10 %. Përfitojnë 4650 mjekë dhe 13 765 infermierë. Për 10 mijë punonjësit e policisë sipas tabelës zyrtare të ministrisë së financave pagat do të rriten nga 10 % në 35 % me një fond shtesë prej rreth 800 milionë lekë. Për vitin 2017 reforma e ndërmarrë për rritjen e pagave në administratën publike do të shoqërohet me rritjen e pagave edhe në sistemin e ushtarakëve në ministrinë e Mbrojtjes duke u llogaritur për çdo gradë nga 8 %deri në 10 %. Nga kjo rritje niveli i pagës së gradës rritet minimalisht me 4000 lekë në muaj dhe maksimalisht rritja shkon në 12560 lekë në muaj./bw/a.k
